საქართველოს პრეზიდენტის წარმომადგენლები მიიჩნევენ, რომ „განათლების შესახებ“ კანონში შესატანი ცვლილებები მოიცავს რიგ საკითხებს, რომელიც შეიძლება დაკონკრეტების შემთხვევაში დისკრიმინაციული გახდეს. ამის შესახებ საქართველოს პრეზიდენტის ადმინისტრაციის უფროსმა გიორგი აბაშიშვილმა და პრეზიდენტის მრჩევლებმა დღეს განათლებისა და მეცნიერების მინისტრ ალექსანდრე ჯეჯელავასთან და მის მოადგილეებთან შეხვედრაზე განაცხადეს.

„აუცილებელია ეს დებულებები დაიხვეწოს ზოგადი განათლების რეფორმის შემდეგ ეტაპზე და მათი დანერგვა მოხდეს საქართველოს კონსტიტუციური ღირებულებების, მათ შორის განათლების საყოველთაოობის და თანასწორობის პრინციპებიდან გამომდინარე,“- წერია საქართველოს პრეზიდენტის ადმინისტრაციის მიერ გავრცელებულ პრესრელიზში.

როგორც პრეზიდენტის ადმინისტრაცია ავრცელებს ინფორმაციას, შეხვედრაზე განათლების მინისტრმა ზოგადი განათლების რეფორმის ხედვა წარადაგინა, გაიზიარა პრეზიდენტის შეხედულებები და აღნიშნა, რომ რეფორმის შემდეგ ეტაპზე ყველა ხსენებული დებულება დაკონკრეტდება ხარისხიანი განათლების საყოველთაო ხელმისაწვდომობის პრინციპიდან გამომდინარე. მიღებული პირობის გამო, პრეზიდენტი ხელს აწერს ამ კანონპროექტს.

პრეზიდენტის ადმინისტრაციაში მიიჩნევენ, რომ შემჭიდროვებულ ვადებში კანონპროექტის მიღებამ არ მისცა დაინტერესებულ საზოგადოებას საშუალება სიღრმისეულად შეესწავლა და ემსჯელა ამ უმნიშვნელოვანეს სფეროში დაგეგმილ რეფორმებზე.