ტურიზმის ეროვნული სააგენტოს ინფორმაციით, საქართველოში ირანიდან შემოსული საერთაშორისო მოგზაურთა რიცხვი განსაკუთრებით, ანუ 485%-ით გაიზარდა და გამეორდა 2012 წლის რეკორდი, როდესაც, ირანიდან საქართველოს 90 ათასამდე ვიზიტორი ჰყავდა.

აღნიშნული განპირობებულია იმით, რომ საქართველომ ირანთან უვიზო რეჟიმი 2016 წლის ზამთარში აღადგინა.

საქართველოს ირანთან უვიზო მიმოსვლა 2010 წლიდან ჰქონდა, თუმცა 2013 წელს, საქართველოს ხელისუფლების გადაწყვეტილებით, ეს შეთანხმება შეჩერდა. მას შემდეგ, რაც 2013 წელს ირანის მოქალაქეებს უვიზოდ შემოსვლა შეეზღუდათ, საქართველოში ირანელ ვიზიტორთა რაოდენობამ კლება დაიწყო, 2015 წელს კი, ეს რიცხვი 25 ათასამდე შემცირდა.

ტურიზმის სააგენტოს ცნობით, ქვეყანაში შემომსვლელთა რაოდენობა გაზრდილია შემდეგი ქვეყნებიდანაც:

• ინდოეთი (+199%),
• საუდის არაბეთი (+116%),
• ფილიპინები (+89%),
• ომანი (+75%)
• ჩინეთი (+46%)

ტურიზმის სააგენტო 2016 წელს, საქართველოში მოგზაურთა საუკეთესო ტოპ-ხუთეულს აქვეყნებს და ესენია:

• აზერბაიჯანი 1 523 075 (+9.3%),
• სომხეთი 1 496 246 (+1.9%),
• თურქეთი 1 254 089 (-9.9%),
• რუსეთი 1 037 564 (+12.0%)
• უკრაინა 172 631 (+21.8%)

ასევე, ევროკავშირის ქვეყნებიდანაც, მათ შორის ლატვიდან, ლიტვიდან, ჩეხეთიდან, ბულგარეთიდან და გერმანიიდან.

რუსეთიდან საერთაშორისო ვიზიტორთა რაოდენობამ, წლის განმავლობაში პირველად, მილიონ ადამიანს გადააჭარბა და 1 037 564 შეადგინა.

თურქეთში განვითარებულმა მოვლენებმა ტურისტების ნაკადის კლება გამოიწვია და წელს, დაახლოებით 140 000 მოგზაურით ნაკლები შემოვიდა.

ტურიზმის ეროვნული სააგენტოს განცხადებით, 2016 წელს, 6 350 825 საერთაშორისო მოგზაური შემოვიდა საქართველოში, რაც 2015 წელთან შედარებით 449 731-ით მეტია, ანუ მათი რაოდენობა 7,6 პროცენტით გაიზარდა.

სააგენტოს განმარტებით, მათ შორის იმ ტურისტების რაოდენობა, რომლებიც 24 საათი და მეტი გაჩერდნენ ქვეყანაში, 19 პროცენტით გაიზარდა და 2 714 773 შეადგინა, რაც 432 802-ით მეტია წინა წლის ანალოგიურ პერიოდთან შედარებით.

მნიშვნელოვნად გაიზარდა შემოსავლები საერთაშორისო ტურიზმიდან. 2016 წლის სამი კვარტლის ჯამური მონაცემებით, შემოსავალი უცხოური ტურიზმიდან საქართველოში შეადგენს 1,7 მილიარდ (1 684 914 617) აშშ დოლარს (ზრდა +11.7 პროცენტი), რაც 177 მილიონი აშშ დოლარით მეტია წინა წლის ანალოგიურ მაჩვენებელზე.

ტურიზმიდან შემოსავალი 2016 წლის საბოლოო მონაცემებით 2 მილიარდ აშშ დოლარს გადააჭარბებს. 2016 წლის სამი კვარტლის ჯამური მონაცემებით, წილმა მთლიან შიდა პროდუქტში 7,3 პროცენტი შეადგინა.

2016 წლის თერთმეტი თვის მონაცემებით, საერთაშორისო მოგზაურების მიერ უცხოური საგადახდო ბარათებით განხორციელებულმა ოპერაციებმა 1 479 633 ათასი ლარი შეადგინა, წინა წლის ანალოგიურ მაჩვენებელთან შედარებით, მაჩვენებელი 10,1 პროცენტით გაიზარდა.