რუმინეთის პრეზიდენტმა, კლაუს იოჰანისმა უარი განაცხადა, ქვეყნის პრემიერის პოსზტე დაემტკიცებინა მუსლიმი ქალი პოლიტიკოსი, სევილ შაიდე. შაიდეს კანდიდატურა დასამტკიცებლად პრეზიდენტს წარუდგინა სოციალ-დემოკრატიულმა პარტიამ, რომელმაც 11 დეკემბრის არჩევნებში ხმების 45 პროცენტი მიიღო.

სატელევიზო მიმართვაში პრეზიდენტმა იოჰანისმა თქვა, რომ მან აწონ-დაწონა შაიდეს მომხრეთა და მოწინააღმდეგეთა არგუმენტები, რის შემდეგაც გადაწყვიტა, რომ მისი კანდიდატურა დაეწუნებინა. თუ კლაუს იოჰანისი სევილ შაიდეს კანდიდატურას დაამტკიცებდა, ის გახდებოდა პირველი მუსლიმი პრემიერმინისტრი ევროპაში და პირველი ქალი პრემიერმინისტრი - რუმინეთში. პრეზიდენტმა სოციალურ-დემოკრატიულ პარტიას სხვა კანდიდატურის წარდგენა მოსთხოვა. თუ კლაუს იოჰანისი მეორე კანდიდატურასაც დაიწუნებს, მაშინ ქვეყანაში არჩევნები ხელმეორედ უნდა გაიმართოს.

როგორც The Guardian წერს, სევილ შაიდეს დაწუნების მიზეზი, შესაძლოა მისი სირიელი ქმრის ფაქტორი იყოს, რომელზეც პოლიტიკოსი 2011 წელს დაქორწინდა. შაიდეს სირიელი ქმარი, 2011 წელს ემიგრაციაში წასვლამდე, 20 წელი სირიის სოფლის მეურნეობის სამინისტროში მუშაობდა, მან მუშაობა მრჩევლის პოზიციაზე გააგრძელა რუმინეთის სოფლის მეურნეობის სამინისტროში, 2015 წელს კი ქვეყნის მოქალაქეობაც მიიღო.

სოციალ-დემოკრატიული პარტიის ლიდერმა პრეზიდენტის საპასუხოდ თქვა, რომ მისი პარტია არ აპირებს პრემიერის პოსტზე სხვა კანდიდატის დასახელებას და იწყებს ბრძოლას, რათა პოსტს ჩამოაშოროს კლაუს იოჰანისი.