ნაციონალური მოძრაობის საბურთალოს შტაბის წევრის, ლაშა ცუცქირიძისა და მისი ოჯახის წევრებზე თავდასხმაზე გამოძიება ჯგუფური ძალადობის მუხლით დაიწყო. ამის შესახებ On.ge-ს შინაგან საქმეთა სამინისტროში განუცხადეს.

უწყების ინფორმაციით, გამოძიება სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით დაიწყო და მიმდინარეობს საგამოძიებო მოქმედებები. ამ მუხლით გათვალისწინებული დანაშაული ისჯება ჯარიმით ან საზოგადოებისათვის სასარგებლო შრომით ანდა თავისუფლების აღკვეთით ვადით ორ წლამდე, იარაღთან დაკავშირებული უფლებების შეზღუდვით ან უამისოდ.

ლაშა ცუცქირიძის დის, თეონა თუთქირიძის განცხადებით, მათ სახლთან თავს დაესხნენ და მის ძმას სცემეს. ის ავრცელებს ფოტოებს, რომლებშიც ჩანს, რომ ლაშა ცუცქირიძე დაშავებულია.

ენმ-ს საბურთალოს შტაბის წევრი ზვიად კუპრავა TV პირველთან ინტერვიუში აცხადებს, რომ ცუცქირიძე ამავე შტაბიდან ოჯახთან ერთად სახლში ბრუნდებოდა, როდესაც ნიღბიანი, სავარაუდოდ, ე.წ. კასტეტებით შეიარაღებული პირები თავს დაესხნენ. კუპრავას განცხადებით, ეს იყო თავდასხმა ოპოზიციური პარტიის წარმომადგენელზე და ამაში ის ხელისუფლებას ადანაშაულებს.