დღეს, 21 დეკემბერს, თავდაცვის მინისტრმა ლევან იზორიამ სომეხ კოლეგასთან ერთად, საქართველოსა და სომხეთს შორის 2017 წლის ორმხრივი სამხედრო თანამშრომლობის ხელშეკრულებას მოაწერა ხელი.

თავდაცვის სამინისტროს განმარტებით, ხელშეკრულება მოიცავს თავდაცვის სტრატეგიული დაგეგმვის, სამხედრო განათლების, მედიცინისა და სამხედრო პოლიციის კუთხით გამოცდილების გაზიარებას.

საქართველოს თავდაცვის მინისტრი ლევან იზორია სომეხ კოლეგას ვიგენ სარგსიანს ორდღიანი ვიზიტით მასპინძლობს.

უწყების მიერ გავრცელებულ განცხადებაში წერია, რომ გაფართოებული შეხვედრის დასრულების შემდეგ ორივე ქვეყნის თავდაცვის მინისტრებმა განცხადებები გააკეთეს და განხილული თემები შეაჯამეს. ლევან იზორიას თქმით, საქართველოს ხელისუფლების ერთ-ერთი მთავარი პრიორიტეტი მეზობელ ქვეყნებთან თანამშრომლობის გაღრმავებაა:

"ჩვენი ქვეყნების ინტერესებშია რეგიონული უსაფრთხოება, მშვიდობა. ჩვენ ყველაფერს გავაკეთებთ მშვიდობის შესანარჩუნებლად. დღეს ხელი მოვაწერეთ თავდაცვის სფეროში მომავალი წლის თანამშრომლობის გეგმას. ის მოიცავს სხვადასხვა ასპექტს, მათ შორის საგანმანათლებლო სფეროში თანამშრომლობას. გვინდა, რომ ეს ურთიერთობები მომავალში უფრო გავაღრმავოთ და განვამტკიცოთ".