ბელარუსის დედაქალაქ, მინსკში ჟურნალისტური საქმიანობის დროს დაკავებულ მედიის წარმომადგენლებს არასანქცირებულ აქციაში მონაწილეობის ბრალდებით გაასამართლებენ. TUT.BY-ს ცნობით, ისინი გუშინ პირველ სექტემბერს დინამოს სტადიონთან დოკუმენტების შემოწმების მიზნით დააკავეს, შემდეგ კი არასანქცირებულ მიტინგში მონაწილეობის ბრალდებით შეადგინეს პროტოკოლი. მათ ემუქრებათ ჯარიმა ან ადმინისტრაციული სახდელი 15 დღემდე ვადით.

დაკავებული ჟურნალისტები კოლეგების მხარდასაჭერად მილიციის განყოფილებასთან შეიკრიბნენ. დაკავებულთა შორის TUT.BY-ს, კომსომოლსკაია პრავდის, ბელარუსისა და ბელაპანის ჟურნალისტები არიან. ისინიც მინსკში მიმდინარე საპროტესტო აქციას აშუქებდნენ. დაკავებული ჟურნალისტების კოლეგები ყვებიან, რომ მედიის წარმომადგენლებმა ღამე სააქტო დარბაზში გაატარეს და სკამებზე ეძინათ. ისინი სასამართლო მოსმენას დღეს ელოდებოდნენ, თუმცა ჟურნალისტები ამ დრომდე მილიციაში რჩებიან.

ბელარუსში მედიის წარმომადგენლებთან ერთად, ოპოზიციისა და აქციის მონაწილეებსაც ხშირად აკევებენ. მინსკში, 24 აგვისტოს, მილიციამ საკოორდინაციო საბჭოს ორი წევრი, სერგეი დილევსკოი და ოლგა კოვალკოვა, არასანქცირებული მასობრივი აქციის ორგანიზების ბრალდებით, დააკავა. საკოორდინაციო საბჭოს პრეზიდიუმის კიდევ ერთი წევრი, ლილია ვლასოვა კი 31 აგვისტოს დააკავეს.

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.