მმართველი გუნდის დეპუტატი ირაკლი კობახიძე ამტკიცებს, რომ არ აქვს ინფორმაცია, რა წესები მოქმედებს ენგურის გამყოფ ხაზზე და როგორ შეიძლება მოხვედრილიყო პატრიოტთა ალიანსის ლიდერი, ირმა ინაშვილი ოკუპირებულ რეგიონში. ამის შესახებ მან რუსთავი 2-ის ეთერში ისაუბრა.

"მე არ ვიცი საიდან გადავიდა. მე, სამწუხაროდ, არ მაქვს ინფორმაცია იმასთან დაკავშირებით, რა წესები მოქმედებს გამყოფ ხაზზე. შესაბამისად, მე გამიჭირდება ამასთან დაკავშირებით პასუხის გაცემა", — ასე პასუხობს კობახიძე კითხვას, რატომ გაატარა უსაფრთხოების სამსახურმა ინაშვილი ენგურის გადასასვლელზე.

პატრიოტთა ალიანსის ლიდერმა, ირმა ინაშვილმა, ოკუპირებულ აფხაზეთში ვიზიტი თავად დაადასტურა, თუმცა ინფორმაციის გავრცელებიდან რამდენიმე დღის განმავლობაში დუმდა. თავდაპირველად, აფხაზეთის ომის ვეტერანთა ორგანიზაციამ არუაამ განაცხადა, რომ ალიანსის ლიდერები ასლან ბჟანიას დამხმარე, ლაშა საყანიამ მიიღო, რაც საყანიამ ჯერ უარყო ოფიციალური განცხადებით, შემდეგ კი დაადასტურა.

საყანია აფხაზურ მედიასთან გაკეთებულ განცხადებაში ამტკიცებდა, რომ პატრიოტთა ალიანსის ლიდერებს "ჰუმანიტარული მისიით" შეხვდა. მისივე მტკიცებით, შეხვედრის მიზანი, რომელიც "რუსი მეგობრების" მხარდაჭერით დაიგეგმა, დავით თარხან-მოურავისგან ოჩამჩირეში მდებარე ილორის ეკლესიისთვის ღვთისმშობლის ხატი გადაცემა იყო. იმავეს იმეორებს ინაშვილიც.

საყანიას განცხადებით, მან, შეხვედრის შესახებ, შეგნებულად არ ჩააყენა საქმის კურსში, არც გალის რაიონის ადმინისტრაცია და, არც დე ფაქტო შინაგან საქმეთა სამინისტრო, რათა შეხვედრას რაიმე სახის ოფიციალური სახე არ მიცემოდა. ინფორმაციის გავრცელებისა და დე ფაქტო ოპოზიციის კრიტიკის შემდეგ, საყანიამ თანამდებოდა დატოვა.