ხელვაჩაურის, ქედის, შუახევისა და ხულოს ოლქში ევროპული საქართველოს მაჟორიტარობის კანდიდატი, ტარიელ ნაკაიძე ბათუმის კათოლიკურ ეკლესიაში წირვას დაესწრო, რომელსაც კათოლიკური ეკლესიის ეპისკოპოსი ჯუზეპე პაზოტო წარუძღვა.

ტარიელ ნაკაიძის თქმით, ის უნდობლობა, რომელიც ეთნიკური და რელიგიური ჯგუფების მიმართ არსებობს, უნდა დასრულდეს. ტარიელ ნაკაიძემ აღნიშნა, რომ საქართველოს ყველა მოქალაქეს სჭირდება თანასწორი, ღირსეული და სამართლიანი გარემო.

"დღეს ვესწრებოდი წირვას ბათუმის კათოლიკურ ეკლესიაში, რომელსაც უძღვებოდა კათოლიკური ეკლესიის ეპისკოპოსი ჯუზეპე პაზოტო. საქართველო ოდითგანვე მრავალეთნიკური და მრავალრელიგიური ქვეყანაა. სწორედ ეს მულტიკულტურული მოზაიკაა საქართველოს სიმდიდრე და სახელმწიფოებრივი ფუნდამენტი", — განაცხადა ნაკაიძემ.

მისი თქმით, საქართველოს ყველა მოქალაქე ვალდებულია, დაასრულოს რელიგიური და ეთნიკური ჯგუფების საფრთხის ჭრილში დანახვა და მათ მიმართ უნდობლობა. ასევე, აღნიშნა, რო უნდა დასრულდეს ხელისუფლების არასეკულარული მიდგომები, სახელმწიფოსა და რელიგიის გამიჯვნის პრობლემები.

"ჩვენ, საქართველოს ყველა მოქალაქეს, განურჩევლად ეროვნებისა და აღმსარებლობისა, გვჭირდება თანასწორი, ღირსეული და სამართლიანი გარემო. სწორედ ამიტომ, მე ვიქნები ყველა ხმაწართმეული და დაჩაგრული ადამიანის ხმის გამტარი პოლიტიკასა და საჯარო სივრცეში", — აღნიშნა ტარიელ ნაკაიძემ.