ევროპული საქართველოს ერთ-ერთი ლიდერი, ფოთის, ხობისა და სენაკის მაჟორიტარობის კანდიდატი გიგა ბოკერია ბორჯომში საერთო ოპოზიციურ შეხვედრაზე იმყოფებოდა, რომელიც გირჩის ინიციატივით და NDI-ის ორგანიზებით ჩატარდა.

გიგა ბოკერიას განცხადებით, საზოგადოების დაკვეთა ევროპული კოალიციაა, ამრიგად მნიშვნელოვანია იმ თემებისა და მიმართულებების განხილვა, რომლებზეც ევროპული კოალიცია იმუშავებს.

"ქვეყანაში დიდი კონსენსუსია იმაზე, რომ ასე გაგრძელება აღარ შეიძლება და ეს ხელისუფლება უნდა შეიცვალოს, მაგრამ იმ ხალხს, ვისაც აქვს ამბიცია და თხოვს ხალხს მხარდაჭერას, უნდა ჰქონდეს კონკრეტული გეგმა, თუ რას გააკეთებს ამ ჩიხიდან ქვეყნის სწრაფად გამოსაყვანად, იმ პირობებში, როდესაც ოპოზიცია ერთმანეთისგან განსხვავდება არსებითად. იმ პირობებში, როდესაც ევროპულ საქართველოს ღრმად სწამს, რომ საზოგადოების დაკვეთა არის ევროპული კოალიციური მმართველობა, ამ დროს საკვანძოა, რომ მნიშვნელოვან თემებზე შევჯერდეთ. ამიტომ მნიშვნელოვანი იყო, რომ ჩვენ შევჯერდით საკმაოდ ფართო სპექტრზე საკითხების და მოვნიშნეთ მიმართულება და პრინციპები, თუ საით უნდა წავიდეთ", — განაცხადა გიგა ბოკერიამ.

ბოკერიამ ასევე თქვა, ხალხისთვის ძალაუფლების დაბრუნების მიმართულებით რა თემებზე იყო საუბარი შეხვედრაზე:

"ეს არის ძალაუფლების, საკუთარ ბედზე, საკუთარ ცხოვრებაზე, გადაწყვეტილების მიღების დაბრუნება ჩვეულებრივ მოქალაქეებისთვის, ხალხისთვის. ეს ეხება ყველაფერს, თვითმართველობას, სამართალდამცავ ორგანოებს, საკუთრებას, ფულს, რომელსაც ხალხი საკუთარი შრომით მოიპოვებენ. იმ ამბიციას, რომ მთავრობა ვითომ მშობელია ჩვენი, თუმცა სინამდვილეში ცუდი ძიძაა, ჩვენ უნდა ჩამოვაცილოთ. ხალხს უნდა დაუბრუნდეს ძალაუფლება და ამ მიმართულებით კონკრეტულ თემებზე იყო საუბარი, ისევე როგორც სასამართლო რეფორმაზე, ასევე შინაგან საქმეთა სამინისტროს რეფორმაზე და მის დეცენტრალიზაციაზე, აგრეთვე საკუთრებაზე, რომელიც თავის დროზე ჩვენს მოქალაქეებს წაართვეს და ახლა უნდა დაუბრუნდეს კერძო საკუთრებაში თემებს, სოფლებსა და მოქალაქეებს; რეალურ თვითმართველობასა და მთავრობის ზომის შემცირებაზე, განათლების რეფორმაზე".

"ვფიქრობ, რომ ზემოხსენებული რეფორმები იქნება იმ ტიპის, რომელიც მოიტანს გარდამტეხ ცვლილებებს. ამ ცვლილებებით ადამიანებს დარჩებათ მეტი ფული და ამას მოელის ხალხი ჩვენგან. ოქტომბრის არჩევნებიდან პირველ 100 დღეში ქვეყანას ეს ცვლილებები უნდა დაეტყოს", — დაამატა გიგა ბოკერიამ.