მმართველი გუნდის დეპუტატი რატი იონათამიშვილი პოპულისტობად აფასებს იმ ფაქტს, რომ ლელომ პატრიოტთა ალიანსის საარჩევნო ბანერი ჩამოხსნა. მისი თქმით, ლელომ სხვა "სუპერპოპულისტ" პარტიებს მოასწრო.

"ლელოც გადაპოპულისტდა. ბათუმის მერიას პატრიოტების ერთი ბანერი უკვე მოხსნილი ჰქონდა და მეორეს ხსნიდა, სადაც სხვა სუპერპოპულისტ პარტიებს ლელომ მიასწრო, გვერდითა ბოძზე აძვრა და ნიუსები გაავრცელა — ჩვენ მოვხსენითო. არა და მდინარაძემ წინასწარ თქვა, მერია კი ხსნის, მაგრამ ესენი მაინც გარბიან და საინტერესოა, რომელი მიასწრებსო..." — წერს იონათამიშვილი ფეისბუქგვერდზე.

სტატუსის ბოლოს იონათამიშვილი გამოეხმაურა პატრიოტთა ალიანსსი ბანერსაც და განაცხადა, რომ მისთვის ძალიან მძიმე საყურებელი იყო. მისივე თქმით, ეს ჩვეულებრივი საბოტაჟია "ეგრეთ წოდებული პატრიოტრა ალიანსის მხრიდან".

ამავე თემაზე:

პრორუსულმა პარტიამ, პარტია პატრიოტთა ალიანსმა განათავსა ბანერი, სადაც საქართველოს რუკაზე აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებენ.

თავად პატრიოტთა ალიანსში კი ამაში პრობლემას ვერ ხედავენ. მეტიც, პარტიის ლიდერს, ირმა ინაშვილს ჰგონია, რომ ეს "აჭარისა და ქვეყნის ერთიანობის დაცვისკენ" მიმართული ქმედებაა. ინაშვილი ამტკიცებს, რომ თურქეთი ახორციელებს ეკონომიკურ და იდეოლოგიურ ექსპანსიას. მოსაზრების დასამტკიცებლად ის იშველიებს სოციალურ ქსელში გავრცელებულ დეზინფორმაციებს ე.წ. ოსმალეთის იმპერიის თურქული გეგმების შესახებ.

პატრიოტთა ალიანსის მხრიდან ეს პირველი შემთხვევა არ არის, როდესაც აჭარის ე.წ. ოკუპაციაზე მიანიშნებენ. სხვადასხვა დეზინფორმაციულ ამბებზე დაყრდნობით პატრიოტთა ალიანსს სურს დაამტკიცოს, რომ არამხოლოდ რუსეთი, არამედ "თურქეთიც ოკუპანტია". მათ არაერთხელ გაავრცელეს ანტითურქული რიტორიკა. ამავდროულად, პარტია ცნობილია პრორუსული და ანტიდასავლური პოლიტიკით.

გაიგეთ მეტი პატრიოტთა ალიანსზე: