ლელო საქართველოსთვის თავმჯდომარემ, მამუკა ხაზარაძემ, ლანჩხუთის რეგიონალური ოფისის გახსნის დროს ლელოს საპროგრამო მესიჯებზე ისაუბრა.

მამუკა ხაზარაძის თქმით, უახლოეს 4 წელში საქართევლოში სამუშაო ადგილების რაოდენობა 200 ათასით გაიზრდება და ქვეყანა ეკონომიკური მიზიდულობის ცენტრად ჩამოყალიბდება.

"ბოლო წლების განმავლობაში მოვისმინეთ ბევრი დაპირება, რომ გაგვეზრდება პენსია ან შემოსავალი. ბოლოს ვართ იქ, სადაც ვიყავით. ბოლო 8 წლის განმავლობაში რაც გაიზარდა, ეს არის სახელმწიფო ვალი, რომელიც თითოეული ჩვენგანის გადასახდელია. ერთ სულ მოსახლეზე ვალი 2400 ლარიდან 7400 ლარამდე გაიზარდა, მაგრამ ადამიანებს არ გაზრდიათ შემოსავალი. ჩვენ გვაქვს კონკრეტული გეგმა, რომ უახლოეს წლებში გავაორმაგებთ საქართველოს ეკონომიკას და გავაორმაგებთ შემოსავალს ერთ სულ მოსახლეზე. უახლოესი 4 წლის განმავლობაში 200 ათასი ახალ სამუშაო ადგილს შევქმნით და საქართველო გახდება მიზიდულობის ცენტრი, სადაც, პირველ რიგში, შევძლებთ იმას, რომ ჩვენს ემიგრანტებს დავაბრუნებთ ქვეყანაში. პოლიტიკაში ჩემთვის მთავარია სიტყვა და მისი ფასი და ამას ჩვენ დავაბრუნებთ", — აცხადებს მამუკა ხაზარაძე.