ადვოკატი მიხეილ რამიშვილი აცხადებს, რომ გარდაცვლილი თამარ ბაჩალიაშვილის მამასთან უცნაური ფორმის საუბრები იმართებოდა. ამის შესახებ მან მთავარი არხის ეთერში ისაუბრა.

გარდა ამისა, რამიშვილი ამბობს, რომ ჯუმბერ ბაჩალიაშვილს დაუკავშირდნენ პირები და კომპიუტერის გახსნასთან დაკავშირებით სხვადასხვანაირი ინფორმაცია მიაწოდეს.

როდესაც ჩავერთე საქმეში მამამ მითხრა, რომ იმ პერიოდში, როცა მას სამართალდამცავ ორგანოებთან ჰქონდა შემხებლობა და ინტენსიურად იღებდა ინფორმაციას, დაუკავშირდნენ პირები, არა ერთი არამედ რამდენიმე და ერთ-ერთმა უთხრა, რომ მათ გახსნეს კომპიუტერი და მისი გოგო იყო შარში. შემდგომში სხვამ უთხრა, რომ კომპიუტერი არ იყო გახსნილი, მეორემ უთხრა, რომ ყო გახსნილი. მერე რაღაც მიტინგებთან დაკავშირებით, ხომ მოვილაპარაკეთო... ძალიან ისეთი, შანტაჟის, ვაჭრობის მაგვარი საუბრები იმართებოდა გაურკვეველი და ცოტა უცნაური ფორმის საუბრები იყო", — აღნიშნა ოჯახის ადვოკატმა.

მისივე თქმით, ისინი დაადგენენ, ვინ დაუკავშირდა გარადცვლილის მამას და ვინ ესაუბრებოდა მას.

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლეოობამდე მიყვანის მუხლი დაემატა.

დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში, თუკი სამძებრო სამუშაოებში ჩართული იყო დრონი. ადვოკატს, ასევე, აქვს კითხვა, რატომ იპოვა მანქანა მწყემსმა და ვერ მოახერხა ეს პოლიციამ.

ადვოკატის ინფორმაციით, გარდაცვლილის მანქანაში იპოვეს მისი ტელეფონი, რომელიც გამორთული იყო და ამოღებულია სხვადასხვა მედიკამენტიც. რამიშვილს არ აქვს ინფორმაცია, კონკრეტულად რა პრეპარატებია, თუმცა აცხადებს, რომ ფსიქოტროპული არ არის.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგში დღეს შსს შევიდა. დირექტორი ამტკიცებს, რომ ბაჩალიაშვილის გარდაცვალება ზეგ-ში საქმიანობას არ უკავშირდება.

ამავე თემაზე: