ჟურნალისტი აკაკი გოგიჩაიშვილი, აჭარის ტელევიზიაში მთავარი საინფორმაციო გამოშვების მთავარი პროდიუსერის პოზიციაზე იწყებს მუშაობს. ამის შესახებ ინფორმაცია On.ge-ს გოგიჩაიშვილმა დაუდასტურა და უთხრა, რომ ოფიციალურად პროდუსერობას 1 ივლისიდან დაიწყებს.

გოგიჩაიშვილის თქმით, აჭარის ტელევიზიაში პოზიცია დირექტორის მოადგილემ, ვახტანგ ხუზმიაშვილმა შესთავაზა. აკაკი გოგიჩაიშვილის თქმით, ისინი წარსულში ტელეკომპანია იბერიაზე თანამშრომლები იყვნენ. აჭარის ტელევიზიაში გადასვლამდე გოგიჩაიშვილი ჭიათურაში მანგანუმის მომპოვებელი კომპანია ჯორჯიან მანგანეზის პრესსპიკერი იყო.

გოგიჩაიშვილი ამბობს, რომ მის სარედაქციო პოლიტიკაში და დამოუკიდებლობაში არავინ ჩაერევა. მისივე შეფასებით, აჭარის საზოგადოებრივი მაუწყებელი კრიტიკულ მედიად რჩება და სურს, რომ გამოშვებებში "საზოგადოების აზრი" მეტად ისმოდეს.

აჭარის ტელევიზიაში მომხდარი ცვლილებების ფარგლებში, აკაკი გოგიჩაიშვილის ცოლი, ნინო ხაჟომია 24 თებერვალს, საინფორმაციოს პროდიუსერად დაინიშნა. 4 დღეში მან პოსტი საკუთარი განცხადებით დატოვა, მოგვიანებით კი მაუწყებლის საინფორმაციო სამსახურის ონლაინრედაქტორი გახდა.

ბოლო რამდენიმე თვეა, მას შემდეგ, რაც ტელევიზიის დირექტორი ქართული ოცნების მიერ დაკომპლექტებული ბორდის შერჩეული გიორგი კოხრეიძე გახდა, აჭარის ტელევიზიაში სიტუაცია იძაბება. თანამშრომლები დირექტორის გადაწყვეტილებებს აპროტესტებდნენ, რომლებიც სარედაქციო დამოუკიდებლობის შესუსტების მცდელობად მიაჩნიათ.

კერძოდ, კოხრეიძემ უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. 19 თებერვალს კი გაუუქმა თანამდებობა საინფორმაციო სამსახურის უფროსის მოადგილეს, მაია მერკვილაძეს. 28 თებერვალს მან სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

4 მარტს აჭარის მაუწყებლის საინფორმაციო სამსახურის უფროსის მოვალეობის შემსრულებლად დაინიშნა გიორგი აბაზაძე, რომელიც სოციალურ ქსელებში ჰომოფობიური და სექსისტური შინაარსის გზავნილებით გამოირჩეოდა. ჟურნალისტების განცხადებით, მისი შერჩევის პროცესი გაუმჭვირვალე იყო. მათი თქმით, დირექტორს, აღნიშნულ თანამდებობაზე ლაშა ზარგინავას ან ირინა ყურუას კანდიდატურას სთავაზობდნენ, თუმცა მათი პოზიცია ხელმძღვანელობამ არ გაითვალისწინა.

6 მარტს დროებით უფლებამოსილება შეუჩერეს ჟურნალისტ თეონა ბაკურიძეს. დირექტორის შესაბამის ბრძანებაში აღნიშნულია, რომ ტელეწამყვანი საინფორმაციო სამსახურის ახალ უფროსზე "ახდენდა ფსიქოლოგიურ ზეწოლას და აიძულებდა აბაზაძეს განცხადების საფუძველზე დაეტოვებინა მისი პოზიცია".

13 მარტს კი ბაკურიძე დირექტორმა სამსახურიდან გაათავისუფლა და მიზეზად შინაგანაწესის უხეში დარღვევა დაასახელა. ჟურნალისტი მიიჩნევს, რომ მენეჯმენტის ეს გადაწყვეტილება უსამართლოა და აპირებს ამ თემაზე დავა გააგრძელოს. სასამართლოში თეონა ბაკურიძის და აჭარის ტელევიზიის სხვა ჟურნალისტების უფლებებს EMC დაიცავს. ბაკურიძე ამჟამად TV პირველის ჟურნალისტია.

ამავე თემაზე: