ქართული ოცნების დეპუტატის, ირაკლი კობახიძის თქმით, საერთაშორისო პარტნიორებს გიორგი რურუასთან დაკავშირებით "საინფორმაციო ბიულეტენი" გაუგზავნეს, რათა მათ იცოდნენ სიმართლე — ვინ ვინ არის და ვინ ვინ არ არის. ამ თემაზე კომენტარი მან მედიასთან გააკეთა.

"მათ უნდა იცოდნენ სრული სიმართლე, თუ ვინ ვინ არის და ვინ ვინ არ არის, შესაბამისად ეს ინფორმაცია მიეწოდათ საერთაშორისო პარტნიორებს და ისინი ობიექტურ შთაბეჭდიელაბს ჩამოიყალიბებენ იმასთან დაკავშირებით, თუ რა ხდება საქართველოში და ვინ არის და ვინ არ არის პოლიტპატიმარი", — თქვა ირაკლი კობახიძემ.

მთავარი არხის მეწილის, გიორგი რურუას ადვოკატების განცხადებით, ქართულმა ოცნებამ ევროპარლამენტარებს წერილით მიმართა. მათივე ინფორმაციით, წერილში საუბარია 1993-1994 წლებზე და მხედრიონზე.

ამასთან, ადვოკატებმა წარმოადგინეს დოკუმენტი საქართველოში შინაგან საქმეთა სამინისტროს საინფორმაციო-ანალიტიკური დეპარტამენტიდან, რომლის მიხედვითაც, უწყებაში წარსულში გიორგი რურუას სისხლისსამართლებრივ პასუხისგებაში მიცემასთან დაკავშირებით ინფორმაცია არ მოიპოვება.

ადვოკატ დიმიტრი საძაგლიშვილის თქმით, ქართული ოცნების წერილში მითითებულია, რომ რურუას წინააღმდეგ საქმეები მიმდინარეობდა, თუმცა ნაციონალური მოძრაობის ხელისუფლებაში ყოფნის დროს შეწყდა. თუმცა, საძაგლიშვილი აღნიშნავს, რომ მის მიმართ წინა წლებთან დაკავშირებით კითხვები არ დასმულა არც ქართული ოცნების პერიოდში.

დიმიტრი საძაგლიშვილის აზრით, სავარაუდოდ, ქართული ოცნება ამ წერილით ევროპარლამენტარების წინაშე გიორგი რურუას პატიმრობის გამართლებას ცდილობს. მისი ინფორმაციით, წერილი რამდენიმე დღის წინ გაიგზავნა.