ევროპული საქართველოს ერთ-ერთი ლიდერი, გიგა ბოკერია ამბობს, რომ პარტია საარჩევნო სისტემის ცვლილებების მეორე და მესამე მოსმენაში მონაწილეობას არ მიიღებს, თუ 8 მარტის შეთანხმების შესრულებისკენ ქართული ოცნება ნაბიჯებს არ გადადგამს. ეს განცხადება დეპუტატმა პარტიის საგანგებო ბრიფინგის დროს გააკეთა, როცა ცნობილი გახადა, რომ ევროპული საქართველო საკონსტიტუციო ცვლილებებს პირველი მოსმენით მხარს დაუჭერს.

"ივანიშვილს აქვს კიდევ ერთი შანსი, მინიმუმ რამდენიმე დღის დრო, რომ არც საკუთარი თავი დაღუპოს პოლიტიკურად და პერსონალურად და ქვეყანასაც არ მიაყენოს დამატებითი ზიანი. პირველი მოსმენის კენჭისყრაში ჩვენი მონაწილეობა მას აძლევს ამის შანსს. შემდგომ კენჭისყრებში ჩვენ მონაწილეობას არ მივიღებთ, თუ მეორე მხრიდან არ გადაიდგმება ის ნაბიჯი, რომელიც აუცილებელია შეთანხმების შესრულებისთვის; იმ პირობის შესრულებისთვის, რომელიც დაიდო ქართული საზოგადოების და საქართველოს მეგობრების წინაში", — თქვა ბოკერიამ.

მანვე განმარტა, რომ პირველი მოსმენის ჩაგდება პროცესს საბოლოოდ შეაფერხებდა, ამიტომაც მიიღო პარტიამ მონაწილეობის გადაწყვეტილება, მიუხედავად იმისა, რომ გიორგი რურუა არ გაუთავისუფლებიათ.

"პირველი მოსმენის ჩავარდნა გამოიწვევს პროცესის საბოლოოდ გაჭედვას. ჩვენ ამ სცენარისთვისაც მზად ვართ მაგრამ ეს არის ცუდი სცენარი ქვეყნისთვის და ჩვენ ვაძლევთ შანსს, რომ ეს სცენარი არ განხორციელდეს. დანარჩენი არის ივანიშვილის ხელში. მას შეუძლია თავიც დაიღუპოს და ქვეყანასაც მიაყენოს ზიანი, ან გადადგას ნაბიჯი, რომელიც ყველას ინტერესშია", — თქვა დეპუტატმა.

დღეს ცნობილი გახდა, რომ ევროპული საქართველო საარჩევნო სისტემის ცვლილებების კენჭისყრაში მონაწილეობას მიიღებს და პირველი მოსმენით მხარს დაუჭერს. დავით ბაქრაძის განცხადებით, პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს. მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით.