თეთრი ხმაურის მოძრაობის ინფორმაციით, დღეს, სავარაუდოდ ნარკოტიკული ნივთიერების შეძენა-შენახვის ბრალდებით ერთი ქალი დააკავეს. პაატა საბელაშვილის ცნობით, როდესაც დაკავებულის შვილი სახლში მივიდა, ბინა გაჩხრეკილი დახვდა:

"შემოვიდა ზარი, ჩვენი მხარდამჭერი დააკავეს. სავარაუდოდ იყო ნარკოტიკული ნივთიერების შეძენა-შენახვა. ჩვენამდე ასე მოვიდა ხმა. ქალზე არის საუბარი. მისცეს ერთი ზარის განხორციელების უფლება. შვილს დაურეკა და ამის მეშვეობით შევიტყვეთ ჩვენ ამ ინციდენტის შესახებ...როდესაც შვილი მივიდა სახლში, მეზობელთან დახვდა დატოვებული გასაღები შევიდა სახლში და დახვდა ასეთი სურათი."

საბელაშვილის თქმით, პოლიცია დაკავებულის სახლში მოტყუებით, "ყველანაირი ორდერის გარეშე" შევიდა

"გაზიდან ვარო და ასე მოტყუებით შეაღწია ადამიანის სახლში ყველანაირი ორდერის გარეშე. ამის უფლებას პოლიციას აძლევს ჩვენი უსამართლო და დანაშაულებრივი კანონმდებლობა, კერძოდ ოპერატიული ინფორმაცია. არ სჭირდება მას მოსამართლისთვის დადასტურება იმის, რომ საკმარისი საფუძველი აქვს მას იმისთვის, რომ შეიჭრას მოქალაქის პირად სივრცეში, თავდაყირა დააყენოს მისი სახლი.

თეთრი ხმაურის მოძრაობის აქტივისტის ინფორმაციით, დაკავებულმა ბიოლოგიური მასალის ჩაბარებაზე უარი თქვა, ჩხრეკის შედეგად კი მცირე ოდენობით მარიხუანა უპოვეს:

"ამ ადამიანმა, ცხადია, უარი განაცხადა როგორც ბიოლოგიური მასალის ჩაბარებაზე, ისე კლინიკურ დათვალიერებაზე. ჩხრეკის დროს უპოვეს მცირე რაოდენობით ბალახი, მარიხუანა. სავარაუდოდ ეს მოხმარებაში გავა."

On.ge ცდილობს დაუკავშირდეს შინაგან საქმეთა სამინისტროს.