ოპოზიციური პარტიები ხელისუფლებას კიდევ ერთხელ მოუწოდებენ სრულად შესრულოს 8 მარტის შეთანხმება და გიორგი რურუა პატიმრობიდან გათავისუფლდეს. ამ თემაზე მათ ერთიანი განცხადება გამოაქვეყნეს.

განცხადებაში აღნიშნულია, რომ 8 მარტის შეთანხმების ყველა კომპონენტის შესრულება და საკონსტიტუციო ცვლილებების მიღება, ფუნდამენტურად მნიშვნელოვანია ქვეყანაში შესაძლო პოლიტიკური კრიზისის თავიდან ასარიდებლად.

"ოპოზიციური პარტიები, რომლებსაც საპარლამენტო წარმომადგენლობა აქვთ, კვლავაც მზად არიან მხარი დაუჭირონ შეთანხმებულ საკონსტიტუციო ცვლილებებს, თუ შეთანხმების ყველა პუნქტი შესრულდება. შეთანხმება ვერ ჩაითვლება შესრულებულად, სანამ საპატიმროში რჩება პოლიტიკური პატიმარი, გიორგი რურუა", — წერია განცხადებაში.

პარტიები აღნიშნავენ, რომ გიორგი რურუას წინააღმდეგ მიზანმიმართული სახელისუფლებო კამპანია მიმდინარეობს.

"გვსურს, კიდევ ერთხელ მოვუწოდოთ ხელისუფლებას, შეასრულოს 8 მარტს აღებული ვალდებულებები, რაც ქვეყანას საშუალებას მისცემს მოემზადოს 2020 წლის საპარლამენტო არჩევნებისათვის ნაკლებად პოლარიზებულ პოლიტიკურ გარემოში და განამტკიცებს ჩვენს დემოკრატიულ სისტემას", — წერენ ისინი.

განცხადებას ხელს აწერენ:

  • გირჩი
  • ერთიანი ნაციონალური მოძრაობა
  • ევროპული საქართველო
  • ეროვნულ-დემოკრატიული პარტია
  • ახალი საქართველო
    რესპუბლიკური პარტია
  • ლელო
  • ლეიბორისტული პარტია
  • სახელმწიფო ხალხისთვის
  • ერთიანი საქართველო
  • გამარჯვებული საქართველო
  • ევროპელი დემოკრატები
  • ქრისტიან-კონსერვატული პარტია
  • სამოქალაქო ალიანსი თავისუფლებისთვის
  • თავისუფალი დემოკრატები.