ბათუმში ყოფილი სიძის განზრახ მკვლელობის მცდელობისთვის ერთი პირი დააკავეს. ამის შესახებ ინფორმციას შინაგან საქმეთა სამინისტრო ავრცელებს.

უწყების ცნობით, ბრალდებულმა ბათუმში, ღამის საათებში, ურთიერთშელაპარაკებისას, დის ყოფილ მეუღლეს ცივი იარაღის გამოყენებით სხეულზე ჭრილობები მიაყენა. მათივე ინფორმაციით, დაჭრილი სამედიცინო დაწესებულებაში გადაიყვანეს და მისი ჯანმრთელობის მდგომარეობა სტაბილურად მძიმეა.

სამინისტროს ინფორმაციით, პოლიციამ ბრალდებული მომხდარიდან მალევე, ცხელ კვალზე დააკავა და დანაშაულის იარაღი - დანა ნივთმტკიცების სახით ამოიღო.

მომხდარზე გამოძიება სისხლის სამართლის კოდექსის 19-108-ე მუხლით მიმდინარეობს, რაც სასჯელის სახით 7-დან 15 წლამდე ვადით თავისუფლების აღკვეთას ითვალისწინებს.