განათლებისა და მეცნიერების მინისტრი, ალექსანდრე ჯეჯელავა მიიჩნევს, რომ მხოლოდ სწავლა არ არის სკოლის მთავარი ფუნქცია. სკოლის შესახებ საკუთარ ხედვებზე მინისტრი კვირის პალიტრას ესაუბრა:

"ბავშვმა თუ იცის ფიზიკა, მაგრამ ვერ იტანს მეზობლებს, რა არის ამაში მოსაწონი? ღმერთმა მშვიდობაში მოახმაროს ყველას ქიმია და ფიზიკა, თუ მეგობრობას, გვერდში დგომასა და ადამიანობას სკოლაში ვერ ისწავლის. ჩემს დროს სკოლაში ასწავლიდნენ, რომ მხოლოდ საკუთარი თავის იმედად უნდა ყოფილიყავი, ჯგუფური მუშაობა არ შეიძლებოდა, რადგან კარნახად და მაიმუნობად ითვლებოდა. როდესაც კომაროვი ოქროს მედალზე დავამთავრე და გარეთ გამოვედი, აღმოვაჩინე, რომ შენს უნარებზე კი არ არის აგებული ცხოვრება, სხვა ადამიანების გვერდით დგომაზე. ჩვენ გვინდა ისეთი სკოლა, რომელიც იმისთვის ამზადებს ბავშვს, რაც ცხოვრებაში დასჭირდება. დღემდე ველოდები, როდის გამომადგება დედაქალაქების ზეპირად ცოდნა, 43 წლის ვარ და ჯერ არ დამჭირვებია".

როგორც განათლების მინისტრი ამბობს, უპირატესობა კრიტიკულ აზროვნებას უნდა მიენიჭოს და არა - მათემატიკური ფორმულების, მოლური მასებისა და ისტორიული თარიღების დაზეპირებას. მისივე თქმით, მისი სურვილია, ტაბუირებული თემები არ არსებობდეს და საზოგადოებამ თავისუფლად იმსჯელოს ნებისმიერ საკითხზე.