დაავადებათა კონტროლის ეროვნული ცენტრის ხელძღვანელი ამბობს, რომ მომავალი პერიოდის განმავლობაში გარკვეული წესების დაცვა აუცილებელი იქნება და სწორედ ეს იგულისხმება, როცა საუბარია კორონავირუსთან თანაცხოვრებაზე.

ასე უპასუხა მან ჟურნალისტების კითხვას საზოგადოებრივი ტრანსპორტის აღდგენის შესახებ და ხომ არ გაზრდის ეს ინფიცირების რისკს.

გამყრელიძის თქმით, უნდა გვახსოვდეს, რომ ჯერჯერობით არ არსებობს ვაქცინა, რომელიც გარდატეხას შეიტანდა ვირუსის დამარცხებაში. ასევე, არ არსებობს წამალი, რომელიც უშუალოდ ამ ვირუსს კლავს. ამიტომ, ის კვლავ პირადი და საზოგადოებრივი ჰიგიენის დაცვისკენ, ასევე, სოციალური დისტანციისკენ მიუთითებს.

"პირბადე გახლავთ სწორედ სოციალური დისტანცირების ერთ-ერთი შემადგენელი ატრიბუტი და ასევე, პირადი და საზოგადოებრივი ჰიგიენის დაცვის ატრიბუტი. ამიტომ აუცილებელი იქნება მომავალი თვეების და შეიძლება წლის განმავლობაშიც პირბადის ტარება, ჩვენ ამას უნდა მივეჩვიოთ; აუცილებელი იქნება იგივე საზოგადოებრივ ტრანსპორტში ყველამ დავიცვათ გარკვეული დისტანცია; აუცილებელი იქნება, რომ საზოგადოებრივ ტრანსპორტში ყველამ ვატაროთ პირბადე; აუცილებელი იქნება ხელების დამუშავება სხვადასხვა სადეზინფექციო საშუალებებით. თანდათან ამ წესებს უნდა მივეჩვიოთ, თავი უნდა ავარიდოთ თანდათან დიდ თავყრილობებს, მიუხედავად იმისა, რომ ძალიან გვიყვარს", — აღნიშნა გამყრელიძემ.

საქართველოს მთავრობის გადაწყვეტილებით, 29 მაისიდან საზოგადოებრივი ტრანსპორტი, მათ შორის მეტრო მუშაობას განაახლებს. 1 ივნისიდან კი გაიხსნება ყველა სახის ღია მაღაზია, მათ შორის, მოლები. 8 ივნისიდან იგეგმება კაფეების, რესტორნების, სასტუმროებისა და საქალაქთაშორისო ტრანსპორტის აღდგენა.