ევროპული საქართველოს ლიდერი, გიგი უგულავა აცხადებს, რომ გამარჯვებული საქართველოს ლიდერი, ირაკლი ოქრუაშვილი პოლიტიკურად მისთვის მიუღებელია. ამის მიზეზად უგულავამ ოქრუაშვილის რუსეთისადმი დამოკიდებულება დაასახელა.

TV პირველის ეთერში უგულავამ განაცხადა, რომ მოლაპარაკების მაგიდასთან განსხვავებული ადამიანები არიან შეკრებილი, რადგან სიტუაცია მოითხოვს ამას.

"ივანიშვილმა მიიყვანა იქამდე მდგომარეობა, რომ დიამეტრალურად განსხვავებული პარტიები და პოლიტიკოსები აღმოჩნდნენ ერთად იმაში, რომ თამაშის წესი სჭირდება ყველას. ის, რომ მე ირაკლი ოქრუაშვილი და გიორგი რურუა ერთად აღმოვჩნდით, ეს სწორედ ამის შედეგია.

ეს იმას კი არ ნიშნავს, რომ მე ოქრუაშვილის პოზიცია რუსეთზე მომწონს, არასდროს არ მომეწონება ეს და ის თუ ამ პოზიციას არ შეიცვლის, ჩემთვის მიუღებელი დარჩება პოლიტიკურად", — განაცხადა მან.

უგულავამ ასევე აღნიშნა, რომ ოპოზიციაში ოქრუაშვილის ყოფნა მისი ამომრჩევლის გადასაწყვეტია:

"ჩემთვის გეოპოლიტიკურად რუსი და მენტალურად საბჭოთა ადამიანი ხელისუფლებაში არის სახიფათო და ის ოპოზიციაში თუ საკუთარ ელექტორატს წარმოადგენს ეს მისი საქმეა და მისი ამომრჩევლის".

ირაკლი ოქრუაშვილი და გიგი უგულავა სხვადასხვა საქმეებზე იყვნენ დაპატიმრებული. ოპოზიცია და საერთაშორისო პარტნიორების ნაწილი მათ პოლიტიკურ პატიმრებად მიიჩნევდა და გათავისუფლებას მოითხოვდა, რაზეც მმართველი გუნდი აცხადებდა, რომ ისინი დამნაშავეები არიან და მართმსაჯულებაში ვერ ჩაერევიან. ორივე მათგანი პრეზიდენტმა, სალომე ზურაბიშვილმა შეიწყალა.

18 მაისის შეხვედრაზე ოპოზიციურმამ პარტიებმა განცხადება გაავრცელეს, სადაც ამბობენ, რომ საქართველოს დემოკრატიზაციის გზაზე ერთმანეთთან კოორდინირებულად მოქმედება აქვთ გადაწყვეტილი.

მათი თქმით, პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, 8 მარტის შეთანხმების შესრულებისკენ და საქართველოში პოლიტიკური სიტუაციის ნორმალიზაციისკენ მნიშვნელოვანი ნაბიჯია.

ოპოზიციის წევრები იმედს გამოთქვამენ, რომ საპატიმროს მალე დატოვებს გიორგი რურუაც და ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად.