"შალვა ნათელაშვილი ჩამოყალიბდა ქართული პოლიტიკის პატრიარქად. ის სხვა თაობის არის უფრო, წინა თაობისაა პოლიტიკაში", — ასე შეაფასა ევროპული საქართველოს ლიდერმა, გიგი უგულავამ ლეიბორისტული პარტიის ლიდერი. ამის შესახებ მან TV პირველის ეთერში განაცხადა.

ლეიბორისტული პარტია წლების განმავლობაში აკრიტიკებდა ნაციონალური მოძრაობას, რომლის წარმომადგენელიც უგულავა იყო. ბოლო რამდენიმე თვის განმავლობაში პარტიები პროპორციული საარჩევნო სისტემის მოთხოვნით გაერთიანდნენ. შალვა ნათელაშვილი ოპოზიციის გაერთიანების მასპინძლად ითვლება, რადგან შეხვედრები მისი პარტიის ოფისში იმართება.

უგულავამ ეთერში ამაზეც ისაუბრა და აღნიშნა, რომ ოპოზიციის მოლაპარაკებების მაგიდასთან ერთმანეთისგან განსხვავებული პარტიები არიან და ყველა ერთად შედიან "ახალ ეპოქაში, რომელიც მრავალპარტიულია".