ოპოზიციის ერთ-ერთი ლიდერი, ირაკლი ოქრუაშვილი დარწმუნებით აცხადებს, რომ 2020 წლის საპარლამენტო არჩევნებში ის მაჟორიტარი კანდიდატის სახით წარდგება. ამაზე მან დღეს, 18 მაისს ლეიბორისტული პარტიის ოფისში ოპოზიციის კონსულტაციების შემდეგ ირაუბა:

"ერთმნიშვნელოვნად [საერთო მაჟორიტარული კანდიდატებით უნდა წარვდგეთ], დარწმუნებული ვარ ამაში. დიდი ალბათობით, პარტიები დამოუკიდებლად წარდგებიან არჩევნებზე, მაგრამ ამ დამოუკიდებლობას აუცილებლად ექნება საერთო მაჟორიტარულ კანდიდატებზე შეთანხმების სტრატეგია. აუცილებლად ვიქნები მაჟორიტარი, თუმცა სად, ამას მოგვიანებით გეტყვით. არ ვარ დარწმუნებული, მაგრამ არ გამოვრიცხავ [გორში კენჭისყრას]."

ოქრუაშვილის თქმით, ყველა ოპოზიციური პარტიის ლიდერმა ეს ნაბიჯი უნდა გადადგას ნებაყოფლობით. მისივე განცხადებით, მაჟორიტარული ოლქები "ბრძოლის წინა ხაზი" უნდა იყოს.

18 მაისის შეხვედრაზე ოპოზიციურმამ პარტიებმა განცხადება გაავრცელეს, სადაც ამბობენ, რომ საქართველოს დემოკრატიზაციის გზაზე ერთმანეთთან კოორდინირებულად მოქმედება აქვთ გადაწყვეტილი.

მათი თქმით, პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, 8 მარტის შეთანხმების შესრულებისკენ და საქართველოში პოლიტიკური სიტუაციის ნორმალიზაციისკენ მნიშვნელოვანი ნაბიჯია.

ოპოზიციის წევრები იმედს გამოთქვამენ, რომ საპატიმროს მალე დატოვებს გიორგი რურუაც და ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად.