თურქეთის პრეზიდენტი, რეჯეპ ტაიპ ერდოღანი აცხადებს, რომ მისთვის მნიშვნელობა არ აქვს, ევროპის კავშირი უახლოეს მომავალში დაგეგმილ კენჭისყრაზე შეაჩერებს თუ არა გაერთიანებაში თურქეთის გაწევრიანების მრავალწლიან პროცესს. ამის შესახებ თურქული გამოცემა, Hurriyet Daily News წერს.

პრეზიდენტმა ერდოღანმა ევროკავშირში დაგეგმილი კენჭისყრის შესახებ დღეს, სტამბულში, COMCEC-ის (ისლამური თანამშრომლობის ორგანიზაციის ეკონომიკისა და კომერციის მუდმივმოქმედი კომიტეტი) შეხვედრისას ისაუბრა:

"წინასწარ ვამბობ, ამ კენჭისყრას ჩვენთვის არანაირი მნიშვნელობა არ აქვს, როგორი შედეგითაც არ უნდა დასრულდეს ის".

ერდოღანისვე თქმით, აღნიშნული კენჭისყრა მიუთითებს იმაზე, რომ ევროკავშირი მხარს უჭერს და იცავს ტერორისტულ ორგანიზაციებს.

22 ნოემბერს, ევროკავშირში განაცხადეს, რომ შესაძლოა, მიმდინარე კვირას ჩატარდეს კენჭისყრა და გაიყინოს თურქეთის გაწევრიანების პროცესი, რომელიც უკვე წლებია მიმდინარეობს.

ევროკავშირი შეშფოთებულია ბოლო თვეებში თურქეთში მიმდინარე პროცესების გამო. კერძოდ, 2016 წლის ივლისში, თურქეთში მომხდარი გადატრიალების მცდელობის შემდეგ, ამავე ბრალდებით, თურქეთის ხელისუფლებამ ათასობით ადამიანი დააპატიმრა და სამსახურიდან გაათავისუფლა. ე.წ. წმენდაში მოყოლილთა რაოდენობა 100 ათასს აჭარბებს. მათ შორის არიან ჟურნალისტები, მოსამართლეები, პროკურორები, სამხედროები, მასწავლებლები, პოლიციელები და ყველა ის ადამიანი, ვინ ფეტულა გიულენის ორგანიზაციასთან არის შემჩნეული.

თურქეთის ხელისუფლება სწორედ ამერიკაში მცხოვრებ ფეტულა გიულენს ადანაშაულებს გადატრიალების მცდელობაში და მის ორგანიზაციას ტერორისტულს უწოდებს.

თურქეთის ოპოზიციურ ძალებსა და დასავლელ ლიდერებს მიაჩნიათ, რომ თურქეთის ხელისუფლება 15 ივლისის გადატრიალების მცდელობა იყენებს ძალაუფლების უზურპაციისა და პოლიტიკური ოპონენტების დევნისთვის.