შინაგან საქმეთა სამინისტროს ინფორმაციით, კახეთში დამამძიმებელ გარემოებაში ოჯახის წევრის განზრახ მკვლელობისთვის ძებნილი პირი დააკავეს.

უწყების ინფორმაციით, მკვლელობა სოფელ ყანდაურაში 2019 წლის 3 მაისს მოხდა. ბრალდებულმა ურთლიერთშელაპარაკების ნიადაგზე მეზობლებსა და ოჯახის წევრებს დაზიანებები მიაყენა. მათივე ცნობით, დაკავებულ პირზე ძებნა 2019 წლის 20 ივლისს გამოცხადდა.

შინაგან საქმეთა სამინისტროს ინფორმაციით, მომხდარზე გამოძიება საქართველოს სისხლის სამართლის კოდექსის 11 პრიმა-109-ე მუხლის მე-2 ნაწილის "ვ" და მე-3 ნაწილის "ა" ქვეპუნქტებით მიმდინარეობს. ბრალი ოჯახის წევრების მიმართ დამამძიმებელ გარემოებაში ჩადენილ განზრახ მკვლელობას გულისხმობს და 13-დან 17 წლამდე პატიმრობას ითვალისწინებს.

სოფელ ყანდაურაში მკვლელობის საქმეზე თავდაპირველად 85 წლის ომარ გამყრელიძე და მისი შვილიშვილი დააკავეს. ომარ გამყრელიძეს მოგვიანებით აღკვეთის ღონისძიება, პატიმრობა 2 000-ლარიანი გირაოთი შეეცვალა. 85 წლის ომარ გამყრელიძეს გამოძიება მკვლელობაში დახმარებას, ხოლო მის შვილიშვილს საბრძოლო მასალის უკანონო შეძენა-შენახვას ედავებოდა.

საქმე ეხება 2019 წლის 3 მაისს მომხდარ ფაქტს. მაშინ, პოლიციამ შემთხვევის ადგილზე დააკავა ომარ გამყრელიძე. უწყების მტკიცებით, მასზე მეზობლები აცხადებდნენ, რომ ცეცხლსასროლი იარაღიდან სასიკვდილო ჭრილობები მიაყენა — შვილს, რძალს და ორ მეზობელს, ხოლო ჯანმრთელობის დაზიანება მიაყენა ცოლსა და მოკვლით ემუქრებოდა სხვა პირებსაც.