ნაციონალური მოძრაობის ლიდერი, ნიკა მელია აცხადებს, რომ ირაკლი ოქრუაშვილის განაჩენის შემდეგ, მისი პარტია ხელისუფლებასთან აღარ ითანამშრომლებს. იგი საუბრობს თანამშრომლობაზე საარჩევნო რეფორმის მხარდაჭერის კუთხით. TV პირელის ეთერში ინტერვიუს დროს, ოპოზიციონერმა აღნიშნა, რომ ნაციონალური მოძრაობა დღის ბოლომდე მოითათბირებს ამ საკითხზე:

"ნაციონალური მოძრაობა აღარ მიიღებს მონაწილეობას ამ მასკარადში. მე ვერ ვხედავ ვერანაირ რესურსს ამ მოძალადე ანტიდემოკრატიულ ხელისუფლებასთან თანამშრომლობისა, თუნდაც ჩვენი უცხოელი პარტნიორების თანამონაწილეობით პირდაპირ ერთ-ერთი პირობა იყო შეთანხმების, რომ პოლიტიკური პატიმრები უნდა გათავისუფლებულიყვნენ. ირაკლი ოქრუაშვილი კი არ გაათავისუფლეს, 5 წლით თავისუფლების აღკვეთა მიესაჯა არარსებულ საქმეზე".

დღეს, 13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. ამავე საქმეზეა ბრალდებული ოპოზიციონერი ნიკა მელიაც. მას აღკვეთი ღონისძიების სახით გირაო აქვს შეფარდებული.