გერმანიის არმიამ კენიაში, ნაირობის აეროპორტში ექვსი მილიონი სამედიცინო ნიღაბი დაკარგა. ამის შესახებ CNN-ს გერმანიის თავდაცვის სამინისტროს პრესსპიკერმა განუცხადა.

გერმანიის თავდაცვის სამინისტრომ ჯანდაცვის სამინისტროს დავალებით უცნობ კომპანიას FFP2 ტიპის ნიღბები შეუკვეთა. პრესსპიკერის თქმით, მათ ზუსტად არ იციან, რატომ დაიკარგა ნიღბები ან რომელი ქვეყნიდან ხდებოდა მათი გადმოზიდვა. გერმანიის მხარეს გზავნილის მიღებაში თანხა არ გადაუხდია, ანგარიშსწორება პროდუქციის ჩაბარების შემდეგ უნდა მომხდარიყო.

შეკვეთა გერმანიაში 20 მარტს უნდა ყოფილიყო. ბოლოს ის კენიის აეროპორტში დააფიქსირეს, მას შემდეგ კი ინფორმაცია აღარ განახლებულა.

"არ ვიცით, საქმე ქურდობასთან გვაქვს, თუ მომწოდებელი არ იყო სანდო", - აცხადებს ანონიმური წყარო გერმანიის მთავრობიდან.

ამჟამად გერმანიაში კორონავირუსით ინფიცირების 30 081 შემთხვევაა დაფიქსირებული.