მთავრობის ადმინისტრაციაში 24 მარტს გამართულ ბრიფინგზე კიდევ ერთხელ განმარტეს, რომ აიკრძალა შეკრება და მანიფესტაცია, საჯარო სივრცეში 10-ზე მეტი პირის თავშეყრა. პრემიერის პრესსპიკერის, ირაკლი ჩიქოვანის თქმით, საჯარო სივრცე ნიშნავს ნებისმიერ ადგილს, როგორც გარეთ, ასევე, შენობებში. მან ჩამოთვალა, რა შემთხვევაში აიკრძალა და რა შემთხვევაშია დასაშვები 10-ზე მეტი პირის ერთ სივრცეში ყოფნა:

  • აკრძალვა არ ეხება მხოლოდ კერძო პირის საცხოვრებელ ადგილს.
  • აიკრძალა ყველა ტიპის სოციალური ღონისძიება, რომელიც 10-ზე მეტი პირის შეკრებას ითვალისწინებს. ისეთები, როგორიცაა სხვადასხვა სარიტუალო ღონისძიებები.
  • 10-ზე მეტი პირის თავშეყრა დასაშვებია იმ კერძო დაწესებულებაში, რომლებიც აგრძელებენ მუშაობას. ისინი ვალდებულები არიან, დაიცვან 2-მეტრიანი სოციალური დისტანცია და დაემორჩილონ ჯანდაცვის სამინისტროს რეკომენდაციებს.

მთავრობის პრესსპიკერმა გამონაკლისებს შორის არ დაასახელა საეკლესიო რიტუალები, რა დროსაც, წირვისას ათეულობით ადამიანი იკრიბება ერთ სივრცეში. 20 მარტს, სინოდის სხდომის დასრულების შემდეგ ცნობილი გახდა, რომ კორონავირუსის პანდემიის მიუხედავად, ზიარების რიტუალი და წირვა-ლოცვა ისევ ჩატარდება ეკლესიებში. მღვდელმთავრებმა აღნიშნეს, რომ ისინი მრევს დისტანციის დაცვისკენ მოუწოდებენ.

საგანგებო მდგომარეობის მიუხედავად 22 მარტის საკვირაო წირვა სამების ტაძარში შეუფერხებლად გაიმართა. წირვას დაესწრო კათოლიკოს პატრიარქი ილია მეორეც. ტაძარში შეკრებილ მრევლს პერიოდულად აფრთხილებდნენ, დაეცვათ დისტანცია, თუმცა მათი ნაწილი ამას ვერ ახერხებდა. ზოგიერთი მათგანი პირბადის გარეშე იყო მისული. წირვისას საერთო კოვზით ჩატარდა ზიარების რიტუალიც.

21 მარტს საგანგებო მდგომარეობაზე საუბრის დროს პრემიერ-მინისტრმა, გიორგი გახარიამ განაცხადა, რომ ათზე მეტი ადამიანის შეკრება იზღუდება.

საგანგებო მდგომარეობის გამოცხადების დროს, გიორგი გახარიამ განაცხადა, რომ ათზე მეტი ადამიანის შეკრება იკრძალებოდა. ჟურნალისტების კითხვაზე ეხებოდა თუ არა ეს ეკლესიაში შეკრებებს გახარიამ უპასუხა:

"შეკრების შეზღუდვა ეხება ყველას და ყველაფერს და ამის მიზანი გახლავთ ჩვენი მოქალაქეების ჯანმრთელობაზე ზრუნვა. საქართველოს მთავრობის ძირითადი ამოცანა გახლავთ ვიზრუნოთ ჩვენი მოქალაქეების ჯანმრთელობაზე მიუხედავად მათი რელიგიური მრწამსისა".