თავდაცვის მინისტრმა ლევან იზორიამ საქმიანობის 100 დღის შეჯამებისას განაცხადა, რომ თავდაცვის სამინისტროში წვევამდელების სისტემა აღდგება. მისი თქმით, ამ მხრივ ცვლილებები იგეგმება და ჩამოყალიბდება ახალი სისტემა:

"ჩვენს პარტნიორებთან ერთად საუკეთესო უცხოური გამოცდილების გათვალისწინებით მივედით დასკვნამდე, რომ წვევამდელების სისტემა უნდა აღდგეს, იმიტომ რომ გარკვეული პრობლემები იკვეთება წვევამდელების გარეშე შეიარაღებულ ძალებში, კერძოდ, დაკომპლექტების პრობლემა. ჩვენ გარკვეულ პრივილეგიებს მივცემთ ვადიან მოსამსახურეებს. დღეს მათ მხოლოდ წელიწადში ორჯერ აქვთ შვებულების გამოყენების საშუალება, ისიც მხოლოდ უქმე დღეებში. ჩვენ თითოეულს უქმე დღეს მივცემთ, რომ დაისვენონ. ჩვენ მათ ვთავაზობთ ახალ სისტემას, ეს იქნება უფრო ეკონომიური, ანუ თუ წელიწადში 25 ათასიდან 26 ათასამდე უჯდებოდა იგი სახელმწიფოს, უკვე 9 ათასი დაუჯდება. ჩვენ მათ გარკვეულ პრივილეგიებს მივცემთ, დღეს თვეში 7 ლარია მათი თვიური ანაზღაურება და მომავალში ექნებათ 50 ლარი თვეში. ასევე, ახალი სისტემა არსებითად განსხვავდება ძველი სისტემისგან, საბრძოლო მომზადების თვალსაზრისითაც".

27 ივნისს თავდაცვის ყოფილმა მინისტრმა, თინათინ ხიდაშელმა მედიასთან გამართულ შეხვედრაზე ხელი მოაწერა თავდაცვის სამინისტროს წვევამდელთა გაწვევის გაუწმების შესახებ ბრძანებას. ხიდაშელმა ასევე განმარტა, რომ თუ მის მომდევნო მინისტრს აღნიშნული გადაწყვეტილების შეცვლა მოუნდება, მას მოუწევს ბრძანების გაუქმებას მოაწეროს ხელი.

მიღებული ცვლილება სამხედრო მოსამსახურეთა მხოლოდ იმ 25%-ს შეეხებოდა, რომელსაც ჯარში აქამდე თავდაცვის სამინისტრო იწვევდა. რაც შეეხება დანარჩენ 75%-ს, რომელსაც შსს და სასჯელაღსრულების დეპარტამენტი იწვევს ჯარში, მათ ეს ცვლილება არ ეხებათ.