დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ცენტრის დირექტორის მოადგილე პაატა იმნაძე აცხადებს, რომ კორონავირუსით ინფიცირებული ერთ-ერთი პირის ყველა კონტაქტი აქვთ მოძიებული. ჟურნალისტის კითხვაზე, ერთ-ერთ ინფიცირებულს ჰქონდა თუ არა გარე კონტაქტი სამსახურში ან სხვაგან, იმნაზე პასუხობს, რომ კი.

"ჯანმრთელობის მსოფლიო ორგანიზაციის განმარტებით, კონტაქტად ითვლება ადამიანი, ვისაც 15 წუთი და მეტი ჰქონდა უშუალო ურთიერთობა ინფიცირებულთან", — განმარტა იმნაძემ სოფო ზურაბიანის პოლიტიკის ფორმულაში.

დაავადებათა კონტროლის ცენტრის დირექტორი ამირან გამყრელიძე მოუწოდებს იმ პირებს, ვინც კორონავირუსით ინფიცირების მაღალი რისკის ქვეყნებში იყვნენ აუცილებლად დარჩნენ თვითიზოლაციაში. მისი თქმით, არ აქვს მნიშვნელობა მგზავრებს სიმპტომები ექნებათ თუ არა.

"გავითავისოთ ეს დიდი სამოქალაქო პასუხისმგებლობა სულ ყველამ, ვინც ბრუნდებით იტალიიდან. გავიჭირვოთ და 14 დღე ვიყოთ თვითიზოლირებული", — განაცხადა მან.

ამ ეტაპზე საქართველოში კორონავირუსით ინფიცირების 9 შემთხვევაა დადასტურებული. პირველი 26 თებერვალს დაფიქსირდა, მეორე — 28 თებერვალს, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს, საღამოს. გამყრელიძის განცხადებით, ბოლო 6 ინფიცირებული ერთად მოგზაურობდა იტალიაში.

ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: