დაავადებათა კონტროლის ცენტრის ცხელი ხაზი 116 001

დაავადებათა კონტროლის ცენტრის დირექტორის მოადგილე, პაატა იმნაძე მოუწოდებს დამსაქმებლებს, რომ იმ თანამშრომლებს, რომლებიც მაღალი რისკის ქვეყნებიდან დაბრუნდნენ, ორი კვირა სამსახურში არ დაუშვან. ამის შესახებ მან გიორგი თარგამაძის ფორმულაში ისაუბრა.

"იმ სამსახურის ხელმძღვანელებმა, ვინც იციან, რომ მათი თანამშრომლები, ვთქვათ, იტალიიდან დაბრუნდნენ, მოვუწოდებ მათ, რომ ორი კვირის განმავლობაში სამსახურში არ დაუშვან და სახლში იყვნენ. ამით რისკი გაიზრდება სხვა მათი თანამშრომლებისთვის", — განაცხადა პაატა იმნაძემ.

ბოლო მონაცემებით, კორონავირუსის დაინფიცირებულთა რიცხვმა 88 282-ს მიაღწია. COVID-19-ის გამო კი უკვე სამი ათასი ადამიანი გარდაიცვალა. მაღალი რისკის ქვეყნებად მიიჩნევა ჩინეთი, სამხრეთ კორეა, იაპონია, იტალია და ირანი.

საქართველოში ამჟამად კორონავირუსის სამი შემთხვევაა დაფიქსირებული. კორონავირუსით ინფიცირების პირველი შემთხვევა საქართველოში 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე კი — 29 თებერვალს.

ვირუსის პირველი შემთხვევა დაუდგინდა საქართველოს მოქალაქეს, რომელიც აზერბაიჯანის გავლით ირანიდან შემოვიდა ქვეყანაში. მეორე კი — პირს, რომელმაც ჩრდილოეთ იტალიაში იმოგზაურა. ჯანდაცვის მინისტრის თქმით, პირველი ინფიცირებული საბაჟოდან პირდაპირ ინფექციურ საავადმყოფოში გადაიყვანეს, მეორე ინფიცირებულზე კი ახლა ადგენენ, ვისთან ჰქონდა კონტაქტი. მესამე დაინფიცირებულიც საქართველოს მოქალაქეა, რომელიც ირანიდან შემოვიდა ქვეყანაში. პაციენტს კონტაქტი ჰქონდა პირველ დაინფიცირებულ პაციენტთან, რომელიც ასევე აზერბაიჯანის გავლით, ირანიდან შემოვიდა საქართველოში.

ამავე თემაზე:

გაიგეთ მეტი კორონავირუსის პრევენციის შესახებ: