პრეზიდენტი სალომე ზურაბიშვილი აცხადებს, რომ ქალთა მიმართ განხორციელებული ნებისმიერი ძალადობა მიუღებელია:

"შემაძრწუნებელია მკვლელობის ყველა შემთხვევა, მაგრამ როდესაც ქალს კლავენ, იმიტომ რომ ქალია, ეს საზოგადოების პრობლემაა".

მისივე თქმით, სახელმწიფოს აქტიურ ჩართულობასთან ერთად გადამწყვეტი მნიშვნელობა ენიჭება განათლებას, კულტურას და საზოგადოებრივ კონსოლიდაციას:

"აუცილებელია, საზოგადოების ცნობიერების ამაღლება. ძალადობის პრევენციისათვის მნიშვნელოვანია სახელმწიფო, საზოგადოებრივი და მათ შორის, რელიგიური ორგანიზაციების ერთობლივი მუშაობა და ძალისხმევა".

პრეზიდენტის განცხადებით, საგანგაშო სტატისტიკიდან გამომდინარე მომავალ კვირას ის ქალთა ძალადობის საკითხებზე მომუშავე სახელმწიფო, საერთაშორისო და არასამთავრობო ორგანიზაციებს შეხვდება.

18 თებერვალს სამტრედიაში ქმარმა ცოლი მოკლა. კაცმა მას ყელი იმ დროს გამოჭრა, როცა ქალს სამოქალაქო რეესტრში განქორწინება უნდა გაეფორმებინა. ბრალდებული უკვე დაკავებულია.

16 თებერვალს კი ყოფილმა ქმარმა კიდევ ერთი ცოლი მოკლა. კაცმა ქალი დანით არასრულწლოვანი შვილების თანდასწრებით მოკლა.