რესპუბლიკური პარტიის ყოფილმა ლიდერმა და მე-8 მოწვევის პარლამენტის თავმჯდომარე დავით უსუფაშვილმა, ტვ პირველის ეთერში, ინგა გრიგოლიას დღის ამბებში საკუთარ სამომავლო გეგმებზე მოკლედ ისაუბრა.

მისი თქმით, იგი არ აპირებს მის ირგვლივ პარტიის ჩამოყალიბებას, თუმცა, ყველა დაინტერესებულ ადამიანთან ერთად შეუძლია საქმიანობის გაგრძელება:

"შეიძლება ვიღაცამ ასე დაინახოს, რომ უსუფაშვილი შექმნის პარტიას. მე არ ვაპირებ წავიდე და "უსუფაშვილის პარტია" შევქმნა, არ არის ეს ჩემი ჰობი და ამოცანა...ის რაც ზუსტად შემიძლია გითხრათ ახლა, მე მექნება საუბარი ყველა ჩემს რესპუბლიკელ თანამებრძოლთან, ვინც გადაწყვეტს, რომ სურს პოლიტკური საქმიანობის გაგრძელება ჩემთან ერთად. მე ვსაუბრობ იმ რესპუბლიკელებზე, რომლებსაც სურთ რომ ახალ პოლიტიკურ გუნდში, ახალ პროექტში მიიღონ მონაწილეობა. ბევრმა ვინც გადაწყვიტა პარტიის დატოვება ამ წუთის მდგომარეობით, მათ აქვთ სურვილი რომ ჩვენ ერთად ვისაუბროთ პოლიტიკურ პროცესებზე. მე კოლექტიურად, პარტიებს არ დაველაპარაკები, ადამიანებს, ყველას დაველაპარაკები ვისაც ამის სურვილი ექნება".

დავით უსუფაშვილმა პრეზიდენტ გიორგი მარგველაშვილთან შესაძლო თანამშრომლობაზეც ისაუბრა:

"მარგველაშვილი არის ქვეყნის პრეზიდენტი, რომლის უმთავრესი ძალა სახელმწიფო სისტემაში არის მისი პოლიტიკური ნეიტრალობა. მე უნდა ვიყო ქვეყნის დამაქცევარი და არასწორად მოაზროვნე რომ ახლა მე მარგველაშვილს ველაპარაკო, რომ მოდი პოლიტიკური პარტია შევქმნათ. მე ამაზე მასთან არ მქონია არანაირი საუბარი, თუმცა მე მასთან სიამოვნებით მექნება საუბარი ქვეყნის პოლიტიკური სისტემის მომავალზე".