სახელმწიფო ინსპექტორმა შინაგან საქმეთა სამინისტრო სამართალდამრღვევად ცნო და ადმინისტრაციული სახდელის სახით 2 ათასი ლარი დააკისრა. უწყების ცნობით, სამინისტრო ადმინისტრაციულ სამართალდარღვევის ჩადენის შესახებ ინფორმაციას არაგონივრული ვადით ინახავს.

ფულადი ჯარიმის გარდა, შსს-ს დაევალა გადაწყვეტილების ჩაბარებიდან ექვსი თვის ვადაში ადმინისტრაციულ სამართალდარღვევათა შესახებ მონაცემთა შენახვის ვადების განსაზღვროს და მიიღოს შესაბამისი ზომები.

შსს-ს, ასევე, დაევალა გადაწყვეტილების ჩაბარებიდან ოთხი თვის ვადაში ისეთი ზომების მიღება, რომლებიც უზრუნველყოფენ მონაცემთა სხვა დაწესებულებებისთვის გადაცემის საფუძვლის სათანადო იდენტიფიცირებას.

ამ ფაქტის შესახებ 2019 წლის 15 ოქტომბერს ახალგაზრდა იურისტთა ასოციაციამ მიმართა საქართველოს სახელმწიფო ინსპექტორის სამსახურს. მათი განცხადებით, ადმინისტრაციულ სამართალდარღვევათა ერთიან საინფორმაციო ბანკში, ელექტრონულ ფორმატში ჩანაწერების უვადოდ შენახვა დაუშვებელია. ამასთან, გარკვეული ჩანაწერების შენახვის საჭიროება არსებობს მაქსიმუმ ერთი წლის ვადით.

რატომ ინახავს შსს ოქმებს

ახალგაზრდა იურისტთა ასოციაციის იურისტი, მარიკა დუმბაძე On.ge-სთან საუბარში განმარტავს, რომ მათ შეისწავლეს 20-21 ივნისის აქციის დაშლის დროს დაკავებულთა 50-მდე საქმე. მისი თქმით, სასამართლო პროცესებზე შსს-ს წარმომადგენლები წარადგენდნენ ძველ ადმინისტრაციულ სამართალდართვევათა ოქმებს, რითაც მოსამართლეს უქმნიდნენ შინაგან რწმენას, რომ კონკრეტული პირი სამართალდამრღვევია.

იურისტი იხსენებს, რომ ერთ-ერთი შემთხვევაში 2015 წლის ოქმი წარმოადგინეს, მათ შორის, მოსამართლეს გააცნეს საზოგადოებრივი ტრანსპორტით უბილეთოდ მგზავრობის ოქმებიც. მარიკა დუმბაძე განმარტავს, რომ ისეთი შემთხვევისას, როდესაც კანონი არ ითვალისწინებს სანქციის გაზრდას დანაშაულის განმეორებით ჩადენისას, ოქმი ერთი დღითაც არ უნდა ინახებოდეს.

მისივე თქმით, თუკი შინაგან საქმეთა სამინისტრო არ მიიღებს შესაბამის ზომებს და ოქმების შენახვას გააგრძელებს, სახელმწიფო ინსპექტორის სამსახური უფლებამოსილია,შ იძულებითი აღსრულების ღონისძიებები მოითხოვოს აღსრულების ეროვნულ ბიუროში.