ჭყონდიდის ყოფილი მიტროპოლიტის, მეუფე პეტრეს განცხადებით, ეკლესიაში მიმდინარე მოვლენები სახელმწიფოს განვითარებას აფერხებს. მისი განმარტებით, როდესაც მოსახლეობას ეკონომიკურ კეთილდღეობაზე, სამართლიანობაზე და დემოკრატიულ ღირებულებებზე აქვს პრეტენზია, უნდა ახსოვდეს, რომ ქვეყნის განვითარება ეკლესიის გაჯანსაღების ხაზზე გადის.

"ჩვენ როცა გვინდა პროცესების გაჯანსაღება სახელმწიფოებრივად, უნდა გვახსოვდეს, რომ მთავარი შემაფერხებელი ამ პროცესებისა, ბოლო 10 წლის მანძილზე, არის უწესრიგობა ეკლესიაში, უკანონობა და შერჩევითი სამართალი. ასევე ის, რომ ეკლესია არ არის გათავისუფლებული საბჭოთა მემკვიდრეობისგან", — განაცხადა მან.

მისივე თქმით, ეკლესიაში "კანონს მაღლა ხელმწიფების" დამოკიდებულება იგრძნობა, რაც შერჩევით სამართალს იწვევს. მეუფე პეტრე გამოსავალს საეკლესიო სასამართლოს აღდგენაში ხედავს.

"ერთადერთი გამოსავალია, რომ მოსახლეობა მიხვდეს და ვაიძულოთ, ასე ვთქვათ, ჩვენი სულიერი ხელმძღვანელობა და იერარქია, რომ დავუბრუნდეთ მოქმედებას სჯულის კანონით და ავამოქმედოთ საეკლესიიო სასამართლო, რომლის ფუნქციაც მთლიანად აქვს მითვისებული წმინდა სინოდს", — განაცხადა მან მედიაცენტრ მთავარში პრესკონფერენციაზე.