ამერიკა მზადაა საომარ საკითხებთან დაკავშირებით ირანთან მოლაპარაკება ყოველგვარი წინაპირობის გარეშე დაიწყოს. ამის შესახებ ინფორმაციას BBC ავრცელებს.

მედიის ინფორმაციით, გაეროსთვის გაგზავნილ წერილში ამერიკამ ყასამ სოლეიმანის მკვლელობის მიზეზად თავდაცვა დაასახელა. გაერთიანებული ერების ორგანიზაციას ირანმაც განუცხადა, რომ ამერიკის სამხედრო ბაზებზე საპასუხო შეტევა თავდაცვა იყო, რითიც უპასუხოს გენერლის მკვლელობას.

გაეროს პრესსპიკერმა გუშინ მედიასთან საუბრისას აღნიშნა, რომ გაერთიანებული ერების ორგანიზაცია მიესალმება ლიდერების მხრიდან ესკალაციის არიდების ნებისმიერ ნიშანს. მისი თქმით, ყველამ ერთად უნდა იმუშაოს, რომ სპარსეთის ყურეში ომი არ დაიწყოს.

8 იანვარს, დილით ირანმა ერაყში არსებულ ორ ამერიკულ ბაზას ბალისტიკური რაკეტებით შეუტია. აშშ-ის ცნობით, ამერიკული სამხედრო ბაზების მიმართულებით სულ მცირე 12 რაკეტა ისროლეს. თავდასხმა გასულ კვირას ირანელი გენერლის, სოლეიმანის ლიკვიდაციას უკავშირდება.

ამერიკის პრეზიდენტმა ირანის საპასუხოდ მკაცრი სანქციები დააანონსა. მისი თქმით, სანამ პრეზიდენტია არ დაუშვებს, რომ ირანი ბირთვული შეიარაღების მქონე სახელმწიფო იყოს. ტრამპმა ნატოს მოუწოდა, რომ ახლო აღმოსავლეთის საკითხებში უფრო მეტად ჩაერთოს, რათა პრობლემა ერთად მოაგვარონ.

განხორციელებულ თავდასხმაზე პასუხისმგებლობა ირანის რევოლუციის გუშაგთა კორპუსმა აიღო. მათ განცხადებაში ნათქვამია, რომ ნებისმიერი ქვეყანა, სადაც აშშ-ის სამხედრო ბაზებია განლაგებული, შეიძლება აგრესიის სამიზნე გახდეს. გარდა ამისა, გუშაგთა კორპუსმა ამერიკის მოქალაქეებს მოუწოდა, მთავრობას რეგიონიდან სამხედრო ძალების გაყვანა მოსთხოვონ. ირანული სახელისუფლებო მედიის თქმით, ოპერაციას "მოწამე სოლეიმანი" უწოდეს.

ტრამპმა პირველ კომენტარი აღნიშნა, რომ ჯერ-ჯერობით ყველაფერი რიგზეია. აშშ-ს სამხედრო ძალების წარმომადგენელმა CNN-ს განუცხადა, რომ ერაყის ბაზაზე მყოფ სამხედრო პირებს საკმარისი დრო ჰქონდათ იმისთვის, რომ ირანის სარაკეტო შეტევებს გარიდებოდნენ. მისი თქმით, ჯარისკაცებმა ბუნკერებისთვის თავის შეფარება დროულად შეძლეს.

აინ ალ-ასადის საჰაერო ბაზა ერაყში 2003 წელს, სადამ ჰუსეინის ლიკვიდაციის შემდეგ განლაგდა, შემდეგ კი ერაყში და სირიაში სამხედრო ოპერაციების დროს იყო გამოყენებული. ამ ბაზაზე აშშ-სა და მისი მოკავშირეების 1 500 ჯარისკაცი იმყოფება.

აშშ-ის ავიაციის ფედერალურმა ადმინისტრაციამ ერაყის, ირანის, სპარსეთის ყურისა და ომანის ყურის თავზე სამოქალაქო ფრენები შეზღუდა.

გაიგეთ მეტი: