თითქმის ოთხთვიანი მორატორიუმის შემდეგ პრეზიდენტი სალომე ზურაბიშვილი მსჯავრდებულებს საშობაოდ შეიწყალებს. ამის შესახებ On.ge-ს ინფორმაცია პრეზიდენტის ადმინისტრაციის პრესსამსახურმა დაუდასტურა. შეწყალება ახალი წესების შესაბამისად მოხდება.

მიმდინარე წელს პრეზიდენტის მიერ შეწყალების სისტემის გამჭვირვალობასთან დაკავშირებით არაერთი კითხვა დაისვა. ცნობილი გახდა, რომ აგვისტოს ბოლოს პრეზიდენტმა პოლიციელის მკვლელობაში ბრალდებული შეიწყალა, რომელსაც 2015 წელს 15-წლიანი პატიმრობა მიუსაჯეს. გარდა ამისა, შეწყალების აქტი შეეხო 18 წლის დათო ოთხმეზურის მკვლელობაში ბრალდებულს, ასლან ბეჟანიძეს.

18 სექტემბერს ევროპულ საქართველოში ბრიფინგი გაიმართა, სადაც ირმა ნადირაშვილმა თქვა, რომ პრეზიდენტის ადმინისტრაციაში შეწყალებასთან დაკავშირებული საქმეები უშუალოდ საპარლამენტო მდივნის, დიმიტრი გაბუნიას შუამდგომლობით გვარდება. 20 სექტემბერს კი პროკურატურამ სალომე ზურაბიშვილის მიერ პატიმრების შეწყალების საქმეზე გამოძიება დაიწყო.

ამ ბრალდებასთან დაკავშირებით გაბუნიამ თქვა, რომ შეწყალების საქმესთან მას კავშირი არ აქვს. მოგვიანებით კი განაცხადა, რომ შესაწყალებელთა სია ადმინისტრაციის უფროსის მოადგილემ შეადგინა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მსჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს. 18 სექტემბერს მან შეწყალებაზე მორატორიუმი გამოაცხადა.

ნოემბრის ბოლოს ცნობილი გახდა, რომ შეწყალების ახალ წესზე მუშაობა დაასრულეს. ახალი კრიტერიუმებით შეწყალებულთა რაოდენობა საგრძნობლად შემცირდება.

პრეზიდენტის ადმინისტრაციის განმარტებით, ახალი წესით დადგინდა მძიმე და განსაკუთრებით მძიმე კატეგორიის დანაშაულისათვის მსჯავრდებულ პირთა შეწყალების საქმეების განხილვის კრიტერიუმები, გამარტივდა ნაკლებად მძიმე დანაშაულისათვის მსჯავრდებულ პირთა საქმეების განხილვის პირობები.

პრეზიდენტი უფლებამოსილებას გამოიყენებს განსაკუთრებული და გამორჩეული ინდივიდუალური საქმეების შემთხვევაში, რაც შეწყალების აქტების რაოდენობას საგრძნობლად შეამცირებს.

მათივე თქმით, შეწყალებაზე საბოლოო გადაწყვეტილების მიღებამდე, პრეზიდენტი კიდევ ერთხელ თითოეულ საქმეზე გაივლის კონსულტაციას შესაბამის სახელმწიფო უწყებებთან და დარგის სპეციალისტებთან.