გათავისუფლებულმა ექიმმა, ვაჟა გაფრინდაშვილმა გორის პოლიციაში პირველი კომენტარისას მადლობა გადაუხადა ყველას გვერდში დგომისთვის და თქვა, რომ არ ელოდა გათავისუფლებას:

"არ ველოდი, რომ დღეს ეს მოხდებოდა, გუშინ მომცეს ინფორმაცია რომ 31 სააპელაციო სასამართლო უნდა ყოფილიყო. ალბათ ემოციებით ვარ დატვირთული და ცოტა ძნელია.. მადლობა მინდა ვუთხრა ყველას, ვინც გულთან მიიტანა ჩემი ეს სიტუაცია, პირველ რიგში, მთავრობა იქნება, პარლამენტი, პოლიცია, უშიშროება, კიდევ ჩემს ლამაზ მეუღლეს და ბრწყინვალე შვილებს, ყველა ჩემს მეგობარს, ვინც გვერდში მედგა".

დღეს, 28 დეკემბერს 48-დღიანი უკანონოპატიმრობის შემდეგ ექიმი ვაჟა გაფრინდაშვილი საოკუპაციო ძალებმა გაათავისუფლეს. ექიმი უკვე საქართველოს ცენტრალური ხელისუფლების მიერ კონტროლირებად ტერიტორიაზეა.

ექიმი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზეა.

საოკუპაციო რეჟიმს ვაჟა გაფრინდაშვილის გათავისუფლებისკენ მოუწოდა არაერთმა ქვეყანამ, მათ შორის, ლიეტუვის საგარეო საქმეთა მინისტრმა, ლინას ლინკევიჩუსმა და აშშ-ს მთავრობამ.