მსოფლიო ჩემპიონზე, ქართველი ძიუდოისტის, ლაშა ბექაურზე პოლიციელების მხრიდან შესაძლო ძალადობის საქმეზე გამოძიება დაიწყო. ამ საქმეს სახელმწიფო ინსპექტორის აპარატი იძიებს.

როგორც უწყებაში აცხადებენ, საქმე აღძრულია სისხლის სამართლის კოდექსის 333-ე მუხლის მესამე ნაწილის "ბ" ქვეპუნქტით დაიწყო. ამ მუხლით სისხლისსამართლებრივი პასუხისმგებლობა სამსახურებრივი უფლებამოსილების გადამეტებისთვის დგება.

ლაშა ბექაურმა სამართალდამცავები ძალადობაში რამდენიმე საათის წინ დაადანაშაულა და Facebook-ზე ვრცელი პოსტი დაწერა. თუმცა პოსტი ბრალდების გაჟღერებიდან ორ საათში აღარ იძებნებოდა.

"გაუგებრობა იყო, ნუღარ მკითხავთ ნურაფერს... არაფერი, გაუგებრობა იყო, ნუღარ მისვამთ კითხვებს... არაფერი აღარ მიწერია, წაშლილია ყველაფერი... მეც კარგად ვარ, არაფერი არ მომხდარა", — უთხრა 19 წლის სპორტსმენმა TV პირველის ჟურნალისტს და არც ერთ დასმულ კითხვას არ უპასუხა.