უმრავლესობის წევრს კარლო კოპალიანს ჰგონია, რომ საარჩევნო სისტემის შეცვლის მოთხოვნით მიმდინარე საპროტესტო აქციები მარაზმია. ამის შესახებ მან tv პირველის ეთერში განაცხადა.

"ის, რაც დღეს ხდება, არ არის პროტესტის ფორმა. ეს არის მარაზმი. ეს რას ჰგავს, ჩვენ თუ ასი ათასი კაცი ვიკრიბებოდით რუსთაველზე, ფოთოლიც არ ჩამოვარდნილა. ახლა ქუჩაში ვერ გაივლი. აგედევნება ორი-სამი ახალგაზრდა კაცი და გიძახის: "მონას", "გოშიას", — განაცხადა კოპალიანმა.

ამასთან, კოპალიანი ერთ-ერთია იმ დეპუტატთა შორის, რომელმაც პროპორციულ საარჩევნო სისტემაზე გადასვლას მხარი არ დაუჭირა. მხარის არ დაჭერის ერთ-ერთ მიზეზად კი სწორედ მარაზმად შეფასებული საპროტესტო აქციები დაასახელა, რომელიც მას შემდეგ დაიწყო, რაც ბიძინა ივანიშვილმა პირობა არ შეასრულა და კანონპროექტი ჩავარდა. როგორც კოპალიანი ამბობს, პროპორციულ სისტემას მხარი უმრავლესობის დეპუტატთა ნაწილმა თავიანთი ნებით არ დაუჭირა. მისი თქმით, ის გახარებულია, რომ ისეთ გუნდშია, სადაც გადაწყვეტილებები "ძალიან დიდი დუღილისა და კამათის" შემდეგ მიიღება.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ სრულად ოპოზიციურმა სპექტრმა და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ