პარლამენტის ყოფილი თავმჯდომარე ირაკლი კობახიძე არ დათანხმდა ასევე ყოფილ თავმჯდომარე დავით უსუფაშვილს, რომ ე.წ. გერმანული მოდელი ვენეციის კომისიას გაუგზავნონ და კონსტიტუციურობა შეაფასებინონ.

"მზად ხარ იმისთვის, რომ მე და შენ აქ ერთმანეთს ხელი ჩამოვართვათ და ვთქვათ, რომ ამ მოდელს მე და შენ ერთად ვაგზავნით ვენეციის კომისიაში და ვამბობთ, რომ ჩვენი შექმნილი პოლიტიკური კრეზისიდან გამოსავლად მიგვაჩნია და მოდი განგვსაჯეთ მიუკერძოებელო ექსპერტებო", — ჰკითხა უსუფაშვილმა კობახიძეს იმედის ეთერში გადაცემა არენაში.

პასუხად კობახიძემ განაცხადა:

"მოდით დავსხდეთ ჩვენ ნებისმიერ ფორმატში, ჩავრთოთ ნებისმიერი ექსპერტი, NGO უცხოელი იქნება თუ შინაური და ჯერ ჩვენ გავარჩიოთ. თუ ჩვენ ვამბობთ, რომ ეს არის პირველი კურსის პირველი ლექციის კაზუსი, ამ შემთხვევაში მოდით, ბანანის რესპუბლიკად ნუ წარმოვჩინდებით და ასეთ კაზუსს ნუ გავუგზავნით ვენეციის კომისიას".

ყოფილი თავმჯდომარეები იმედის ეთერში კამათობდნენ იმასთან დაკავშირებით, რამდენად თავსებადია ეს მოდელი საქართველოს კონსტიტუციასთან. ამის გამო კობახიძემ უსუფაშვილს უთხრა, რომ ის ლოგიკაში ძლიერი არ არის.

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. ოპოზიციური სპექტრი სამოქალაქო აქტივისტებთან ერთად მთავრობის წინააღმდეგ გაერთიანდა და პროპორციული საარჩევნო სისტემის შემოღებას ითხოვენ ე.წ. გერმანული მოდელით.