20 ნოემბერს ინოვაციური სტარტაპებისთვის თბილისში ინოვაციური კონკურსი — Get in the Ring გაიმართა. ეს კონკურსი ერთგვარი უნიკალური საშუალებაა, რომელიც უჩვეულო და სახალისო გზით კონკურსის მონაწილეებს საშუალებას აძლევს თავიანთ ბიზნესიდეებს ხორცი შეასხან და მასშტაბურად ცნობილი გახადონ.

Get in the Ring საერთშორისო კონკურსია, რომელიც ასამდე ქვეყანაში ტარდება. მათ შორის გამონაკლისი არც საქართველოა: წელს ფინალისთვის ექვსი გამორჩეული სტარტაპი შეირჩა, რომელთა ავტორებიც ერთგვარ საბრძოლო რინგზე შეერკინენ ერთმანეთს. რინგი ამ შემთხვევაში სიმბოლურად ყველაზე შესაბამისი ადგილია სწორედ საკუთარი საქმიანი წამოწყების გამოსაცდელად: ადგილობრივ თუ საერთაშორისო ბაზარზე წარმატების მისაღწევად კონკურენტებთან სათანადო წინააღმდეგობის გაწევა გჭირდება — ხშირად სრულიად დაუნდობელ პირობებშიც კი, შესაბამისად რინგია სწორედ ის, რაც მომავალი გამოცდილებისთვის წინასწარ შეამზადებს დამწყებ ბიზნესმენებს.

წელს საქართველოში ერთი რჩეული სტარტაპის გამოსავლენად შეჯიბრი ილიას სახელმწიფო უნივერსიტეტის B101 დარბაზში ჩატარდა, სადაც თავი მოიყარეს კონკურსანტებმა, მათმა გულშემატკივრებმა და უბრალოდ დაინტერესებულმა პირებმა, რომელთაც ადგილობრივი მასშტაბით საინტერესო იდეების გაცნობა სურდათ. ამ კონკურსის ფორმატს გამოარჩევდა კიდევ ის დეტალი, რომ მონაწილეების შეფასებისას მაყურებლებიც იყვნენ ჩართულები — სპეციალური ნეონის ჯოხებით აფიქსირებდნენ თავიანთ შთაბეჭდილებას. ეს ფაქტორი კი კონკურსის მთელ პროცესს დამატებით დაძაბულობასა და ხიბლს მატებდა, რადგან ყველა თანაბრად იყო ჩართული გამარჯვებულის გამოვლენაში.

მაყურებელთან ერთად კონკურსანტებს, რა თქმა უნდა, აფასებდა სპეციალური ჟიური: ილიას სახელმწიფო უნივერსიტეტიდან დიმიტრი ჯაფარიძე და გიორგი აბაშიშვილი, საქართველოში გლობალური მეწარმეობის კავშირის დირექტორი თინათინ გოლაძე, სპარკის წარმომადგენელი სანდრო კანდელაკი, საქართველოს დამსაქმებელთა ასოციაციის აღმასრულებელი დირექტორი ლაშა ლაბაძე და ამერიკის საელჩოს წარმომადგენელი მაკენზი როუ. ჟიურის წევრებმა თავიანთი კომპეტენციიდან გამომდინარე კონკურსის მონაწილეებს კრიტიკული კითხვები დაუსვეს და ამით ერთგვარი კონსულტაცია გაუწიეს მათ, რათა თავიანთი ბინზნესიდეები უფრო მეტად დახვეწონ.

წლევანდელი კონკურსანტების იდეები ცალ-ცალკე და დამოუკიდებლად საკმაოდ საინტერესო და ინოვაციური იყო, თუმცა მხოლოდ ეს არ კმაროდა: რინგზე გამოსულ ორ-ორ მონაწილეს უნდა დაემტკიცებინა, რომ მისი სტარტაპი გაცილებით უკეთესია, ვიდრე მისი მოწინააღმდეგის. მათ სულ ექვსი წუთი ჰქონდათ საკუთარი ბიზნესიდეის პრეზენტაციისთვის, შემდეგ კი მათ მაყურებელი და ჟიური აფასებდა. აღსანიშნავია, რომ წლევანდელ კონკურსში თანაბრად იყვნენ წარმოდგენილი ბიჭი და გოგო მონაწილეები, რომლებმაც მართლაც ძალიან საინტერესო იდეები წარუდგინეს დამსწრე საზოგადოებას.

როგორც ძირთადად ხდება ხოლმე, ამ კონკურსშიც ერთი გამარჯვებული გამოვლინდა: ექვსი მონაწილიდან ჯერ სამი ნახევარფინალისტი შეირჩა, შემდეგ კი ჟიურიმ ერთობლივი გადაწყვეტილებით მათგან გამორჩეულიც გამოავლინა - GGM BOARD GAMES, რომელიც ახალ და უნიკალურ სამაგიდო თამაშს აწარმოებს. ამასთან დაკავშირებით კონკურსის დასრულების შემდეგ On.ge-სთან გამარჯვებული სტარტაპიდეის ავტორმა, მიხეილ ჯოლოკავამ ისაუბრა:

"ეს კონკურსი მთელ ჩემს გუნდს უფრო მეტ მუხტსა და სტიმულს მოგვცემს, რათა კიდევ უფრო მეტი მონდომებით გადავდგათ ახალი ნაბიჯები წარმატებისკენ. მართალია, თავიდანვე თავდაჯერებული ვიყავი და გამარჯვებისთვის გააზრებულად ვიბრძოდი, მაგრამ აქ მიღებული გამოცდილება ახალი ეტაპი იქნება შემდგომი განვითარებისათვის და უფრო მეტადაც მოვემზადებით შემდეგი ეტაპისთვის."

მართალია, Get in the Ring-ის წლევანდელი ქართველი გამარჯვებული უკვე გამოვლინდა, თუმცა ამით ყველაფერი არ დასრულებულა: წინ საერთაშორისო დაჯილდოებაა, სადაც ამჯერად სხვადასხვა ქვეყნის წარმომადგენლები შეერკინებიან ერთმანეთს. სამომავლო გეგმებთან დაკავშირებით უფრო ვრცლად ილიას სახელმწიფო უნივერსიტეტის ბიზნესის, ტექნოლოგიებისა და განათლების ფაკულტეტის დეკანმა, დიმიტრი ჯაფარიძემ ისაუბრა:

"გამარჯვებული კონკურსანტი ავტომატურად ხდება ფინალური ეტაპის მონაწილე და 2020 წლის გაზაფხულზე გლობალურ კონკურსში მიიღებს მონაწილეობას, სადაც დაახლოებით ასი ქვეყნის წარმომადგენელი დაუპირისპირდება ერთმანეთს. ეს ყოველი კონკურსანტისთვის უნიკალური შანსია, რომლის ფარგლებშიც მათ შესაძლებლობა ექნებათ შეხვდნენ საერთაშორისო ინვესტორებს და თავიანთი ბიზნესიდეებისთვის დაფინანსების წყაროები მოიპოვონ."