კომუნიკაციების კომისიის წევრის ვაკანტურ თანამდებობაზე განაცხადების მიღება დასრულდა. თანამდებობის დაკავების სურვილი ოთხმა ადამიანმა გამოთქვა.

მთავრობის მიერ გამოქვეყნებული ინფორმაციიდან ირკვევა, რომ კომისიის მოქმედ თავმჯდომარეს, კახა ბექაურს ამ თანამდებობაზე დარჩენა კიდევ 6 წლით უნდა. მის გარდა, კომისიის წევრობა სურს ამავე უწყების მაუწყებლობის დეპარტამენტის უფროსს, ივანე მახარაძეს, სტუდია მონიტორის გამომძიებელ-ჟურნალისტს, მაია მეცხვარიშვილსა და კომისიის საერთაშორისო ურთიერთობებისა და პროექტების მართვის სამსახურის უფროსს, მარიამ სულაბერიძეს.

კომუნიკაციების კომისიის წევრის თანამდებობა საქართველოში ერთ-ერთი ყველაზე მაღალანაზღაურებადია. მაგალითად, თავად ბექაურმა, ხელფასის სახით, გასულ წელს 200 ათას ლარზე მეტი აიღო.

მმართველი პარტიის ინიცირებული კანონპროექტით, კახა ბექაურს, თანამდებობაზე არჩევის შემთხვევაში, კვლავ შეეძლება კომისიის თავმჯდომარეც იყოს. თავმჯდომარის თანამდებობაზე განმეორებით არჩევაზე შეზღუდვა პარლამენტმა გააუქმა. კახა ბექაური კომისიის წევრად 2014 წლის იანვარში აირჩიეს, მანამდე, 2012 წელს ბიძინა ივანიშვილის ტელევიზიის, მეცხრე არხის დირექტორი იყო.