პარლამენტის წინ მოძრაობა ქვეყნის სამსახურში საპროტესტო აქციას მართავს. არ გაბედო! - ასე მიმართავენ აქტივისტები მთავრობას, რომელსაც პროპორციული საარჩევნო სისტემის კანონპროექტის ჩაგდების მცდელობაში ადანაშაულებენ.

"ტყუილები აჭამეთ პუტინს", " გადაგვაგდებთ? - გადაგჩეხავთ", — ამ და სხვა მესიჯებით ისინი მმართველ პარტიას აფრთხილებენ, რომ არასწორი გადაწყვეტილების მიღების შემთხვავში პროტესტი გაგრძელდება.

"სიმშვიდე არის ჩვენი გენ-გეგმა. მშვიდად დაველოდებით ხვალინდელ კენჭისყრას. ჩვენ დღეს უნდა შევინარჩუნოთ აქ პროტესტის კერა, რომ იცოდნენ არ გვძინავს", — აცხადებს აქციის ორგანიზატორი შოთა დიღმელაშვილი.

დღეს, 13 ნოემბრის სხდომაზე პროპორციულ სისტემაზე გადასვლის კენჭისყრა პარლამენტმა ისევ გადადო. ეს სურვილი უმრავლესობის ლიდერმა, გია ვოლსკიმ გამოთქვა და პარლამენტის წევრები დაეთანხმნენ.

პარლამენტის თავმჯდომარემ თქვა, რომ გადაწყვეტილება საპარლამენტო ოპოზიციის წარმომადგენლებთან ერთად მიიღო. სხდომა ხვალ, 14 ნოემბერს, 12 საათზე განახლდება.

საპარლამენტო უმრავლესობის წევრები კვლავ ვერ შეთანხმდნენ, რომ მხარი დაუჭირონ ცვლილებას, რომლის მიხედვითაც საქართველოში 2020 წლის არჩევნებიც მხოლოდ პროპორციული წესით ჩატარდება. ამას ეწინააღმდეგებიან ის დეპუტატებიც, ვინც თვითონ არიან ამ კანონპროექტის ავტორები, მათ შორის არიან დიმიტრი ხუნდაძე და ირაკლი შიოლაშვილი.

საკონსტიტუციო ცვლილებისთვის, რომელსაც მოქალაქეები რამდენიმეათასიან აქციაზე ითხოვდნენ, კენჭი გუშინ, 12 ნოემბერს უნდა ეყარათ. გუშინაც ვოლსკი იყო ინიციატორი კენჭისყრა უმრავლესობის სხდომის შემდეგ ჩატარებულიყო. დღეს უმრავლესობის სხდომა ჩატარდა, თუმცა უმრავლესობის დეპუტატებმა, რომლებიც მხარს არ უჭერდნენ, აზრი არ შეიცვალეს.