"სინანული მინდა გამოვხატო ქალბატონი ირმას მიმართ, ვაწყენინე", — ამ სიტყვებით დაიწყო გამოსვლა პარლამენტის ყოფილმა, თავმჯდომარემ, ირაკლი კობახიძემ პარლამენტში თავისი კიდევ ერთი გამოსვლა. თავის წინა გამოსვლაში კობახიძემ პატრიოტთა ალიანსს პრორუსული ძალა უწოდა, რამაც ინაშვილი გააღიზიანა.

"ვაწყენინე ქალბატონ ირმას, როდესაც საუბარი მქონდა საგარეო ორიენტაციაზე. ძალიან კარგია თუ ემიჯნებით ამ სტატუსს და საკუთარ თავს არ მიიჩნევთ პრორუსულ პარტიად. თუ გაემიჯნებით სიტყვითა და საქმით, ეს იქნება საუკეთესო", — განაცხადა კობახიძემ.

მისივე თქმით, საგარეო კურსთან დაკავშირებით პატრიოტთა ალიანსსა და ქართულ ოცნებას პრინციპული აცდენა აქვთ. რის შემდეგაც მან მოუწოდა ირმა ინაშვილს, რომ ნაცმოძრაობას თავიანთ განცხადებებში მკაფიოდ გაემიჯნონ, რასაც ინაშვილის რეპლიკები მოჰყვა:

"მე მეუბნები ამას? ირმა ინაშვილს ეუბნები ამას? სათვალე მოგაწოდო?".

დღეს, 13 ნოემბერს პარლამენტში პროპორციულ საარჩევნო სისტემაზე გადასვლას უნდა უყარონ კენჭი. კენჭისყრა გუშინ უნდა ჩატარებულიყო, თუმცა პროცესი გადაიდო.

საკონსტიტუციო ცვლილებას მხარს უჭერდნენ ნაციონალური მოძრაობა და ევროპული საქართველო. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: