ბოლივიის გადამდგარმა პრეზიდენტმა, ევო მორალესმა მექსიკაში თავშესაფარი მიიღო. ამის შესახებ მექსიკის საგარეო საქმეთა მინისტრმა, მარსელო ებრარდმა ტვიტერზე დაწერა. მორალესი უკვე მიემგზავრება მექსიკაში, რომლის ხელისუფლებაც მისი მხარდამჭერია.

ბოლივიის ყოფილმა პრეზიდენტმა თავშესაფრისთვის მექსიკას თვითონ მიმართა. თვითონ მორალესი აცხადებს, რომ ბოლივიის დატოვება მისთვის რთულია, თუმცა უფრო მეტი ენერგიით დაბრუნდება.

ბოლივიის პრეზიდენტი ევო მორალესი 10 ნოემბერს გადადგა. ეს იმავე დღეს მოხდა, როდესაც საპროტესტო აქციების ფონზე ის მოსახლეობას განმეორებითი საპრეზიდენტო არჩევნების ჩატარებას დაჰპირდა.

ბოლივიაში საპროტესტო აქციები მას შემდეგ დაიწყო, რაც 20 ოქტომბრის საპრეზიდენტო არჩევნებში ისევ მორალესმა გაიმარჯვა. მისი მთავარი ოპონენტი კარლოს მესა შედეგებს არ აღიარებდა და თავის მხარდამჭერებს ქუჩაში გამოსვლისკენ მოუწოდა. არჩევნების გაყალბებაზე საუბრობდნენ როგორც ოპოზიცია, ასევე საერთაშორისო სადამკვირვებლო ორგანიზაციები.

მორალესთან ერთად თანამდებობები დატოვეს ვიცე-პრეზიდენტმ, პარლამენტის ორივე პალატის თავმჯდომარეებმა, ზოგიერთმა მინისტრმა და გუბერნატორმა. გარდა ამისა, პოლიციამ დააკავა ადგილობრივი ცენტრალური საარჩევნო კომისიის ხელმძღვანელი და მისი მოადგილე.