თბილისის მერმა დავით ნარმანიამ დღეს თბილისობაზე "საპატიო თბილისელების" ტიტულით რამდენიმე ადამიანი დააჯილდოვა.

თბილისის მერიის პრესსამსახურის ცნობით, საპატიო თბილისელის წოდება წელს მიიღეს:

  • ექიმებმა ლევან ჭაჭიაშვილმა და გელა მუხაშავრიამ;
  • ვეტერანმა ფეხბურთელმა ალექსანდრე ჩივაძემ;
  • მსახიობებმა ლალი ბადურაშვილმა, ნოდარ მგალობლიშვილმა და თამარ სხირტლაძემ;
  • ხელოვნების მოღვაწემ ჯემალ ჭკუასელმა;
  • ლოტბარმა და მომღერალმა რობერტ გოგოლაშვილმა;
  • მოცეკვავემ და ქორეოგრაფმა ფრიდონ სულაბერიძემ;
  • მევიოლინემ და დირიჟორმა ლიანა ისაკაძემ;
  • აკადემიკოსმა გიორგი კვესიტაძემ;
  • მხატვარმა დიმიტრი ერისთავმა;
  • მხატვარმა, მწერალმა, თეატრისა და კინოს რეჟისორმა რევაზ გაბრიაძემ.

დავით ნარმანიას თქმით, საპატიო თბილისელის წოდების მინიჭება ტრადიციაა და ამას იღებენ ის ადამიანები, რომლებსაც მისი თქმით დედაქალაქისა და საქართველოს წინაშე განსაკუთრებული ღვაწლი მიუძღვით:

"საპატიო თბილისელის დაჯილდოება თბილისობის განუყოფელი ნაწილია. ამ ტრადიციას საფუძველი 1979 წლის 28 ოქტომბერს ჩაეყარა. ჩვენ დღეს შევიკრიბეთ და ტრადიციულად, განსაკუთრებული პატივი მივაგეთ და დავაფასეთ იმ ადამიანების პროფესიონალიზმი, ღვაწლი, დამსახურებები, რომლებიც ძალ-ღონეს არ იშურებენ და ჩვენს დედაქალაქს, თბილისს, სრულიად საქართველოს ასახელებენ. ჩვენ მათ „საპატიო თბილისელის“ წოდება მივანიჭეთ. განსაკუთრებული პატივით მინდა გავიხსენო ყველა ჩვენი საამაყო და საპატიო თბილისელი, რომელთაგან სამწუხაროდ, ნაწილი ჩვენს გვერდით აღარ არის".

ღონისძიება ილიას ბაღში გაიმართა. როგორც დავით ნარმანიამ რუსთავი 2-ის ეთერში განაცხადა, წელს თბილისობა მილიონ ლარზე მეტი დაჯდა:

"როგორც წესი, თბილისობის გამართვა დაახლოებით ერთი მილიონი ლარი ჯდება, ოდნავ მეტი. ასეთია წლევანდელი ბიუჯეტიც და დაზუსტებულ ციფრებს მას შემდეგ გამოვაქვეყნებთ, რაც ყველა ღონისძიება დასრულდება".

თბილისობა 2016 ხვალ სრულდება.