აბრეშუმის გზის ეკონომიკური ფორუმის გახსნაზე მყოფმა პრემიერ-მინისტრმა, გიორგი გახარიამ საქართველოს, როგორც რეგიონული ჰაბის მნიშვნელობაზე ისაუბრა. მისი თქმით, ძალიან მნიშნველოვანია ენერგეტიკული დერეფნის განვითარება.

"საქართველო ცდილობს თავისი გეოგრაფიული მდებარეობა გადათარგმნოს კონკრეტულ პროექტებში და შესაბამისად, შეასრულოს ენერგეტიკული დერეფნის როლი", — განაცხადა მან.

მინისტრის თქმით, აქედან გამომდინარე საქართველო მიესალმება და მხარდაჭერას უცხადებს სამხრეთ გაზის დერეფნის, სამხრეთ კავკასიური, ტრანსკადრიატიკული და ტრანსანატოლიური მილსადენების განვითარებას. მისივე თქმით, ყოველივე ზემო აღნიშნულიდან გამომდინარე ქვეყანაში დიდი მნიშვნელობა აქვს სატრანსპორტო ინფრასტრუქტურის მოწესრიგებას.

22-23 ოქტომბერს თბილისში, საქართველოს მთავრობის ორგანიზებით, რიგით მესამე აბრეშუმის გზის ფორუმს მასპინძლობს. ფორუმი აზიასა და ევროპას შორის პოლიტიკური, ეკონომიკური და კულტურული კავშირების გაძლიერებას ემსახურება და მიზნად ისახავს სადისკუსიო პლატფორმის შექმნას, სადაც აბრეშუმის გზის ინიციატივის ქვეყნები, საერთაშორისო ორგანიზაციებისა და კერძო სექტორის წარმომადგენლები განიხილავენ ერთმანეთთან თანამშრომლობის გაღრმავების პერსპექტივებს.

წელს აბრეშუმის გზის ფორუმი 60-მდე სხვადასხვა ქვეყნის 2000-მდე მონაწილეს მასპინძლობს, რომელთაც საშუალება აქვთ განიხილონ ისეთი საკითხები, როგორიცაა გლობალური ეკონომიკის გამოწვევები, ხელოვნური ინტელექტის მზარდი როლი, ტრანსპორტი, ვაჭრობა, ენერგეტიკა, საინვესტიციო შესაძლებლობები თუ სხვა.