სირიაში ქურთებზე თავდასხმის გამო აშშ-მ თურქეთის თავდაცვისა და ენერგეტიკის სამინისტროების წინააღმდეგ სანქციები გაატარა. პრეზიდენტ დონალდ ტრამპის მიერ ხელმოწერილი დოკუმენტი სანქციების გატარების საშუალებას მომავალშიც იძლევა.

სანქციების ქვეშ მოყვნენ თავდაცვისა, შინაგან საქმეთა და ენერგეტიკის მინისტრები, ასევე, მმართველი პარტიის, სამართლიანობისა და განვითარების პარტიის თავმჯდომარის მოადგილე.

აშშ-ს სახელმწიფო მდივანმა, მაიკ პომპეომ განაცხადა, რომ სანქციების მიზანია თურქეთი აიძულოს სირიაში თავდასხმა შეაჩეროს და აშშ-სთან დიალოგისთვის დაბრუნდეს. წინააღმდეგ შემთხვევაში ისინი ანკარას ახალ სანქციებით დაემუქრნენ.

თურქეთის თავდასხმა სირიაში ქურთული დანაყოფების წინააღმდეგ 9 ოქტომბერს დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მათი მიზანია სირიის საზღვარზე ქურთებისგან და ე.წ. ისლამური სახელმწიფოსგან თავისუფალი ზონა შექმნას. როგორც ოფიციალური ანკარა აცხადებს, ამით 1-2 მილიონი სირიელი ლტოლვილი თავის საცხოვრებელს დაუბრუნდება.

ქურთული სამხედრო დაჯგუფებები ე.წ. ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ. თავდასხმის დაწყებამდე აშშ-მ ჯარების გაყვანა დაიწყო, რაც გააკრიტიკეს როგორც აშშ-ში, ისე თვითონ ქურთულმა დაჯგუფებებმა.

თვითონ ტრამპი აცხადებდა, რომ ამერიკელი სამხედროები დაპირისპირებაში არანაირ მონაწილეობას არ მიიღებდნენ. მეორეს მხრივ კი, თურქეთს ეკონომიკური განადგურებით ემუქრებოდა.

13 ოქტომბერს ქურთებმა შეთანხმებას მიაღწიეს სირიის მთავრობასთან. სამთავრობო ჯარები თურქეთის საზღვარზე განლაგდებიან, რათა ქურთებმა თურქეთის თავდასხმების მოგერიება შეძლოს.