20 ივნისის საქმეზე დაკავებული ლევან ჯიქური სასამართლომ 2000-ლარიანი გირაოს სანაცვლოდ დარბაზიდან გაათავისუფლა. ჯიქური 50 დღის განმავლობაში შიმშილობდა რის გამოც ჯანმრთელობის პრობლემები შეექმნა.

On.ge-სთან ჯიქურმა ისაუბრა იმაზე, თუ როგორ გახდა შეუძლოდ დროებითი დაკავების იზოლატორში, სადაც ექიმი არ მიუყვანეს.

"3-4 საათის განმავლობაში ვითხოვდი ექიმს, მეუბნებოდნენ რომ არ ეცალა და არანაირი ექიმი არ მოუყვანიათ. შემდეგ დავბუჟდი, ცხვირიდან სისხლი წამსკდა, ღებინება დამეწყო და გავითიშე. სასწრაფოდ ექიმებს რომ მიყვავდი, მაშინ მოვედი აზრზე. რომ გადამიყვანეს ხელ-ფეხს ვეღარ ვამოძრავებდი, ვერ ვლაპარაკობდი გამართულად. დავიწყე პროტესტის ნიშნად შიმშილობა".

ჯიქურის თქმით, ამის შემდეგ ხელ-ფეხი გაუჩერდა და ჯანმრთელობის სხვა პრობლემებიც შეექმნა.

"მიწვრილდება ხელიც, ფეხიც, ფილტვებზე პრობლემები დამეწყო, რაღაც ქრონიკულ დაავადებებში გადამივიდა. 50 დღე ვიშიმშილე, რომ ამისთვის [გათავისუფლება] მიმეღწია".

ჯიქური განმარტავს, რომ პროკურატურის მტკიცებულება აღიარა და არა ბრალი. მისი თქმით, ჯგუფური ძალადობის ბრალდებას ვერ აღიარებს. მისივე თქმით, ამ საქმეზე ბრალდებული ხალხი სასამართლოში გაიცნო.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 20-მდე პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში. ასევე, პოლიტიკოსი, ირაკლი ოქრუაშვილი